Filipçe ironikisht: „Për gravitetin? Unë. Bie shi? Unë“ – Manasievski iu përgjigj: „Ne vetëm pyetëm, nuk akuzuam“

Këmbimi i reagimeve mes liderit të LSDM-së, Venko Filipçe, dhe zëdhënësit të VMRO-DPMNE-së, Valentin Manasievski, vazhdoi pas akuzave dhe pyetjeve që partia në pushtet ngriti lidhur me rastin e Iva Mihajllovës.

Filipçe reagoi me një postim ironik në rrjetin social X në konferencën për shtyp të Manasievskit, ku zëdhënësi i VMRO-DPMNE-së ngriti pyetje për një lidhje të mundshme mes Filipçes dhe ish-kryeministrit Zoran Zaev me raportin mjekësor për Mihajllovën dhe largimin e saj në Bullgari.

„Sot pyes: A ka diçka për të cilën nuk jam fajtor? A mund të më shmanget diçka? Për gravitetin? Unë. Bie shi? Unë. Dielli ka lindur? Unë. Era? Unë. Toka që rrotullohet? Unë. Vjen dimri? Unë. Uji që rrjedh? Edhe unë“, shkroi Filipçe.

Ai akuzoi pushtetin se me këto pretendime përpiqet të largojë vëmendjen nga dështimet e veta.

„Nuk jam fajtor që kjo bandë nuk mund të fshehë më dështimet e veta. Nuk jam fajtor që gënjeshtrat nuk kalojnë më. As Latas e as Mickoski nuk kanë më frymëzim për këto budallallëqe“, tha lideri i LSDM-së.

Manasievski iu përgjigj reagimit të Filipçes, duke thënë se VMRO-DPMNE nuk ka bërë akuza të drejtpërdrejta, por ka ngritur pyetje për rastin.

„Ne nuk akuzojmë, por drejtpërdrejt pyesim nëse Venko Filipçe dhe Zoran Zaev kanë ndërhyrë, siç kanë raportuar disa media dhe portale në publik, tek shoku i tyre i afërt dhe mjeku Ivan Barbov që të bëjë një raport“, deklaroi Manasievski.

Ai iu referua një raporti mjekësor të datës 19 mars 2026, për të cilin pretendon se është përgatitur nga mjeku Ivan Barbov dhe në të cilin thuhej se trajtimi i mëtejshëm i Mihajllovës duhet të vazhdojë në Bullgari, pasi një trajtim i tillë nuk mund t’i sigurohej në Maqedoni.
Manasievski e pyeti më tej Filipçen pse reagimi i tij ishte kaq i ashpër.

„Pse Venko Filipçe u zemërua kaq shumë dhe menjëherë mendoi se dikush e akuzon për arratisjen e Iva Mihajllovës, unë këtë nuk e di dhe do t’ju drejtoj që këtë pyetje ta bëni pikërisht tek Venko Filipçe“, tha Manasievski.