Mungesa e naftës dizel mund të vazhdojë edhe në vitin 2027, paralajmëron Agjencia Ndërkombëtare e Energjisë

Oferta e reduktuar e naftës dizel në tregun botëror mund të vazhdojë gjatë pjesës më të madhe të vitit 2027, për shkak të prodhimit të kufizuar, ndërprerjeve në furnizimet nga Lindja e Mesme dhe Rusia dhe rezervave të reduktuara, paralajmëron Agjencia Ndërkombëtare e Energjisë (IEA).

Sipas raportit më të fundit mujor të agjencisë, në tremujorin e dytë dhe të tretë të këtij viti janë tërhequr sasi dukshëm më të mëdha të naftës dizel nga rezervat se zakonisht, gjë që ka çuar në uljen e tyre menjëherë para sezonit dimëror, kur kërkesa tradicionalisht rritet.

Edhe pse pritet rikuperim i prodhimit të rafinerive deri në fund të vitit, oferta do të mbetet prapa kërkesës. Sipas vlerësimeve të IEA-s, rezervat me shumë gjasa nuk do të rinovohen para gjysmës së dytë të vitit 2027.

Prodhimi botëror i naftës dizel në tremujorin e dytë është ulur me 1.5 milionë fuçi në ditë krahasuar me të njëjtën periudhë të vitit të kaluar, ndërsa në tremujorin e tretë rënia ka arritur në 1.7 milionë fuçi në ditë.

Një problem shtesë paraqet zvogëlimi i eksportit. Gjatë nëntë muajve të parë të këtij viti, eksporti botëror i naftës dizel është ulur me 10 për qind, ndërsa vetëm në shtator furnizimet nga Lindja e Mesme dhe Rusia kanë rënë me 60 për qind në bazë vjetore.

Gjendjen e ka ndikuar edhe fakti që disa rafineri gjatë verës kanë preferuar prodhimin e kerosenit në vend të naftës dizel.

IEA paralajmëron se çdo ndërprerje shtesë në prodhim ose transport mund të përkeqësojë situatën. Edhe pse në fillim të vitit 2027 pritet një rritje e caktuar e ofertës, kjo nuk do të jetë e mjaftueshme për të kompensuar plotësisht mungesën e krijuar gjatë vitit 2026.