Adoleshenti trondit Manchester United: Kërkon një milion paund dhe minuta të garantuara në fushë

Një dramë e vërtetë po zhvillohet në Manchester United, dhe qendra është 16-vjeçari Jay Jay Gabriel, një nga talentet më të mëdha në futbollin anglez.

Futbollisti i ri dëshiron të largohet nga "Old Trafford", dhe arsyeja janë kërkesat e pazakonta që menaxherët e tij kanë paraqitur para drejtuesve të klubit.

Sipas mediave britanike, ekipi i Gabriel ka kushtëzuar vazhdimin e bashkëpunimit me një sërë kërkesash që kanë habitur drejtuesit e Manchester United.

Futbollisti me talent kërkon fanellën me numrin 77 dhe mbishkrimin "Gabriel Junior", dëshiron të stërvitet ekskluzivisht me ekipin e parë, por edhe kohë të garantuar për lojë në tre ndeshje të përcaktuara paraprakisht.

Sipas "ESPN", përfaqësuesit e tij insiston që ai të marrë të paktën 20 minuta në ndeshjet kundër Sabah, Brighton dhe Bournemouth.

Megjithatë, lista e kërkesave nuk mbaron këtu. Sipas informacioneve të "The Times", përfaqësuesit e futbollistit të ri kanë kërkuar një pagë vjetore me shtatë shifra, domethënë të paktën një milion paund për sezon.

Kjo është një shumë e madhe për një futbollist që ende nuk ka luajtur asnjë minutë në një ndeshje zyrtare për ekipin e parë të Manchester United.

Në "Old Trafford" ishin të gatshëm të plotësonin disa kërkesa. Gabriel-it i është dhënë numri 77, dhe klubi madje ka kërkuar një leje të veçantë për të pasur mbishkrimin e dëshiruar në fanellën e tij.

Megjithatë, kur bëhet fjalë për kohën e garantuar të lojës dhe mënyrën e zhvillimit të tij, drejtuesit e United nuk kanë dashur të bien dakord me kushtet e vendosura.

Interesante është edhe historia e emrit të futbollistit të ri. Ai ka lindur si Joseph Junior Andrew O’Carroll, dhe babai i tij, ish-futbollisti Joe O’Carroll, së bashku me këshilltarët e tij, vendosën ta prezantojnë para publikut si Jay Jay Gabriel, duke besuar se një emër i tillë do të ishte i njohur në marketing.

Raportet mes dy palëve që atëherë janë përkeqësuar aq shumë sa ekipi i Gabriel ka kërkuar ndërprerjen e regjistrimit të tij në klub. Manchester United e ka refuzuar këtë kërkesë dhe i ka ofruar një kontratë të re, por po bëhet gjithnjë e më e sigurt që një nga talentet më të mëdha në futbollin anglez mund të largohet nga "Old Trafford".

Zhvillimin e situatës po e ndjekin me kujdes gjigantët evropianë. Sipas mediave, Real Madrid, Barcelona, Bayern Munich dhe Paris Saint-Germain tashmë kanë shfaqur interes për futbollistin 16-vjeçar.

Foto/ Guliver