I kanë nxitur më shumë persona të investojnë në një platformë të rreme interneti dhe u kanë shkaktuar dëm financiar: padi penale kundër dy personave

Sektori për krim kompjuterik dhe forenzikë digjitale, pranë Prokurorisë Themelore Publike në Bitolj, ka ngritur padi penale kundër M.K., 56 vjeçe nga Bitolja dhe A.S. (38) nga Estonia për shkak të ekzistencës së bazave për dyshim për kryerjen e veprës penale "mashtrim" sipas nenit 247 të Kodit Penal, njoftoi MPB-ja.

Në periudhën nga dhjetori 2025 deri në prill 2026, përmes një aplikacioni mobil, në një kanal me disa qindra abonentë, duke premtuar fitime të pretenduara që kurrë nuk u realizuan, kanë nxitur një numër të madh qytetarësh nga e gjithë shteti që të investojnë fonde financiare në një platformë të rreme interneti dhe në këtë mënyrë u kanë shkaktuar dëm të konsiderueshëm financiar.

Tek Sektori për krim kompjuterik dhe forenzikë digjitale janë dorëzuar pesë ankesa nga qytetarë të dëmtuar, të cilët në periudhën e përmendur janë mashtruar, por sipas të dhënave nga raportet financiare të llogarisë transaksionale të të parashkruarës, në mashtrim janë dëmtuar qindra qytetarë nga shteti, por shumica prej tyre nuk e kanë raportuar rastin.

Lidhur me rastin është zhvilluar një hetim disa mujor në të cilin janë përfshirë institucione të ndryshme vendore dhe të huaja dhe janë shkëmbyer informacione, që rezultuan me zbardhjen e identitetit të kryesve. Gjithashtu, në kuadër të hetimit, Sektori për krim kompjuterik dhe forenzikë digjitale ka zhvilluar bisedë informative me të parashkruarën, ka sekuestruar pajisje elektronike që ajo i përdorte për komunikim të shkruar përmes aplikacionit, dhe me analizën forenzike të të dhënave të nxjerra nga pajisjet e sekuestruara, është vërtetuar vepra penale për të cilën është ngritur padi penale.

Lidhur me aspektin ndërkombëtar të hetimit, pas një analize profesionale të transaksioneve kripto, përmes platformave ndërkombëtare të sigurisë janë siguruar informacione të plota për pronarin e portofolit kripto.

Duke pasur parasysh trendin në rritje të këtij lloji mashtrimesh, Sektori për krim kompjuterik dhe forenzikë digjitale apelon tek qytetarët që të mos besojnë në fitime të lehta dhe të shpejta përmes internetit, ku mashtruesit përmes rrjeteve sociale, profileve të rreme dhe thirrjeve telefonike ofrojnë investime në kriptovaluta me premtime për fitime të larta dhe të sigurta, duke i nxitur ata të depozitojnë para në platforma investimi të rreme, të cilat mund të duken plotësisht legjitime, njoftoi MPB-ja.