Skuadrat snajperiste të „Tigar“ me sukses në garën ndërkombëtare „BORAN 8“ në Turqi

Skuadrat snajperiste të Njësisë Speciale Antiterroriste „Tigar“ arritën një sukses të rëndësishëm në garën prestigjioze ndërkombëtare në qëllimtarinë me snajper „BORAN 8“, e cila u mbajt në Republikën e Turqisë, njoftoi Ministria e Punëve të Brendshme.

„Në një konkurrencë të fortë ndërkombëtare, me pjesëmarrjen e 48 skuadrave nga 22 vende, specialët maqedonas zënë vendin e nëntë të lartë, duke konfirmuar gatishmërinë, profesionalizmin dhe aftësinë e tyre për të konkurruar në mënyrë të barabartë me skuadrat elitare nga shumë vende. Shtatë vendet e para iu përkisnin skuadrave nga Turqia, ndërsa vendin e tetë e zuri një skuadër nga Azerbajxhani“, njoftoi MPB.

Rezultati veçanërisht mbresëlënës i specialëve maqedonas u arrit në disiplinën e qëllimit me pistoletë, duke fituar gjithsej 2.098 pikë, shumë mbi mesataren e garës, e cila ishte 1.173 pikë.

Përveç rezultateve konkurruese të arritura, skuadra maqedonase mori edhe njohje për qëndrimin profesional dhe frymën sportive, duke u zgjedhur ndër tre skuadrat më të mira në kategorinë „fair-play“.

„Me aftësitë e treguara, nivelin e lartë të gatishmërisë, profesionalizmin dhe qëndrimin korrekt ndaj pjesëmarrësve të tjerë, anëtarët e Njësisë Speciale Antiterroriste „Tigar“ përfaqësuan dinjitetshëm shtetin në skenën ndërkombëtare, duke konfirmuar edhe një herë kapacitetet e tyre profesionale“, thonë nga MPB.