Përdoruesit janë në shok: Google fsheh një opsion që të gjithë e përdorin çdo ditë
Google po teston heqjen e plotë të butonit Dislike në YouTube për të gjitha formatet e videove – një veprim që, siç pritej, ka shkaktuar reagime negative tek përdoruesit.
Është vërejtur se Google, duket se po teston heqjen e butonit "Dislike" edhe në videot me format më të gjatë – një ndryshim që tashmë ishte futur për "Shorts" (formati i YouTube për video të shkurtra) që në qershor të këtij viti. Është interesante që Google, sipas pretendimeve, po teston këtë opsion për "butonin e fshehur" Dislike që nga viti 2024.
Gjithçka filloi në vitin 2021, kur Google për herë të parë fshehu numrin e "dislikes" (mos pëlqimeve) në videot e YouTube. Edhe pse ky veprim u prit me kritika të ashpra nga përdoruesit, Google mbeti i vendosur në vendimin e tij, kështu që numri i "dislikes" mbeti i fshehur deri tani kur vetë butoni "Dislike" fshihet plotësisht në të gjitha formatet e videove.
Përdoruesit vunë re këtë ndryshim së fundmi dhe ndanë pamje ekrani ku shihet se butoni "Dislike" nuk është më i dukshëm pranë butonit "Like". Në fakt, Google e bën më të vështirë shprehjen e mosmiratimit për një video; tani përdoruesit duhet të klikojnë ikonën me tri pika në fund të shiritit të opsioneve nën videon, të hapin një menu rënëse dhe vetëm atëherë të zgjedhin opsionin për "dislike" – butoni "Dislike" tani ndodhet menjëherë mbi butonin Raporto.
Ashtu si në rastin e heqjes së numrit të "dislikes", ky ndryshim – siç pritej – nuk u prit mirë nga shumë përdorues të YouTube. Për shembull, një përdorues theksoi se zhdukja e butonit "Dislike" në fakt heq një nga mënyrat e rralla dhe të thjeshta me të cilat përdoruesit mund të shprehin pakënaqësinë e tyre për një video. Një përdorues tjetër, i cili duket se është edhe krijues përmbajtjeje, shtoi se mbështetej në numrin e "dislikes" për të kuptuar se çfarë nuk u pëlqente shikuesve në videot e tij – edhe kur ato shifra nuk ishin më të dukshme për të gjithë.
Të tjerë vunë në dukje se numri i "dislikes" ishte veçanërisht i dobishëm kur kërkohej për udhëzime (tutoriale), pasi lejonte një vlerësim të shpejtë nëse ia vlente të shikohej një video e caktuar, duke ndihmuar përdoruesit të mos humbnin kohë me këshilla potencialisht të pasakta. Disa përdorues gjithashtu mendojnë se alternativat ndaj butonit "Dislike" – si opsioni "Not interested" – ende nuk janë të besueshme mjaftueshëm për të shërbyer si zëvendësim adekuat.
Vlen të përmendet se ky ndryshim nuk prek të gjithë. Disa përdorues në Reddit raportuan se butoni "Dislike" është ende i disponueshëm në pajisjet e tyre, që tregon se Google aktualisht po kryen testime A/B me një futje të kufizuar. Ende nuk është e qartë nëse Google ka ndërmend ta zbatojë këtë ndryshim në mënyrë të përhershme për të gjithë përdoruesit, apo thjesht po eksperimenton me ndërfaqen për të vlerësuar reagimin e publikut.
