Policia finlandeze heton nëse “Google” ka dëmtuar mjedisin gjatë ndërtimit të qendrës së të dhënave

Policia finlandeze ka nisur një hetim penal për shkak të dyshimeve për një vepër penale kundër mjedisit në kantierin e ndërtimit të qendrës së re të të dhënave të “Google”. Hetimi është i fokusuar në degën finlandeze të kompanisë, “Tuike Finland”, dhe punimet ndërtimore pranë qytetit Muhos, në veri të vendit, raporton “Reuters”.

Projekti është pjesë e planit që “Alphabet”, kompania mëmë e “Google”, e njoftoi muajin e kaluar. Bëhet fjalë për një investim prej 13.5 miliardë eurosh në infrastrukturë për inteligjencën artificiale në Finlandë, të cilën “Google” e përshkroi si investimin e tij më të madh në Evropë. Për realizimin u prerën 250,000 pemë.

Sipas aktivistëve ekologjikë, është dëmtuar ekosistemi lokal, ndërsa banorët raportojnë ndotje të rrjedhave të ujit, largim të kafshëve të egra dhe rritje të zhurmës.

MË SHUMË RRETH TEMËS: (Video) “Google” priti 250,000 pemë në Finlandë për ndërtimin e qendrës së të dhënave

Autoritetet theksojnë se “Tuike Finland” ka filluar pastrimin e pyllit dhe punimet për kullimin para se të përfundonin vlerësimet e ndikimit në mjedis, të cilat janë të detyrueshme sipas ligjit finlandez.

Hetim për shkelje në menaxhimin e ujërave

“Sipas informacionit paraprak, ka pasur paqartësi dhe shkelje në sistemin e kullimit dhe menaxhimit të ujërave në kantierin e ndërtimit,” thuhet në njoftimin e policisë.

Policia shton se brenda hetimit penal do të shqyrtohen të gjitha rrethanat lidhur me këto probleme.

Agjencia finlandeze për mbikëqyrjen e mbrojtjes së mjedisit më 6 tetor i kërkoi “Google”-ut të ndalojë të gjitha punimet përgatitore që ndryshojnë mjedisin në Muhos, si dhe në një lokacion tjetër.

“Google” më parë kishte njoftuar se kishte nisur punimet përgatitore sepse besonte se kishte të gjitha lejet e nevojshme në përputhje me ligjin. Nuk kanë dhënë menjëherë përgjigje për kërkesën e re për koment.

Finlanda si destinacion irresistues për qendrat e të dhënave

Finlanda në vitet e fundit është bërë një nga destinacionet kryesore evropiane për këto investime. Arsyet janë klima e ftohtë, disponueshmëria e energjisë elektrike me emetime të ulëta karboni dhe mbështetja e fortë nga Qeveria për projektet lidhur me inteligjencën artificiale.

Edhe pse sipas sipërfaqes është e krahasueshme me Gjermaninë, Finlanda ka më pak se gjashtë milionë banorë, dhe rezistenca e publikut ndaj ndërtimit të qendrave të të dhënave është dukshëm më e ulët se në rajone të tjera, përfshirë Shtetet e Bashkuara të Amerikës.

“Google” ka njoftuar se investimet e planifikuara në Finlandë, përveç qendrave të të dhënave, përfshijnë edhe modernizimin e rrjetit elektrik, si dhe projekte për energji të pastër dhe sisteme baterish.

Këto burime do të përdoren për funksionimin e shërbimeve si “Gemini”, “Google Search”, “Google Maps” dhe “YouTube”.

Kryeministri finlandez Petteri Orpo muajin e kaluar mbështeti planin e “Google”, duke theksuar se investimi do të japë një shtytje të fuqishme për ekonominë.