„Motra, vëllai dhe puseta“, filmi më i ri i Milço Manchevskit fiton në festivalin e filmit në Tokio

„Motra, vëllai dhe puseta“, filmi më i ri i Milço Manchevskit fitoi në Festivalin e Filmit në Tokio, një festival i kategorisë A. Filmi fitoi çmimin kryesor të festivalit, „Tokyo Grand Prix“ (Çmimi i Madh i Tokios).

Kjo është hera e parë që një film maqedonas fiton në një festival të kategorisë A që nga „Para shiut“ i Manchevskit në Venecia në vitin 1994.

Presidenti i jurisë, regjisori legjendar australian Rolf de Heer, gjatë dhënies së çmimit lexoi arsyetimin zyrtar të jurisë:

„Për bashkimin e përsosur të humorit, tragjedisë dhe dramës, për njerëzillëkun dhe dhembshurinë që tregon ndaj personazheve të tij, për filmin kompleks, por koherent, që njëkohësisht arrin të jetë prekës dhe i gjallë, çmimi i madh i Tokios – Çmimi i Guvernatorit të Tokios për filmin më të mirë – i jepet „Motra, vëllai dhe puseta“.

Manchevski ndau gëzimin për çmimin e fituar dhe falënderoi të gjithë ata që besuan në krijimin e filmit:

„Më vjen shumë mirë që bota e do pusetën tonë. Falënderime për ekipin fenomenal, aktorët, financuesit, sponsorët – për besimin në një film të çuditshëm. Ja një shembull që këmbëngulja dhe drejtësia fitojnë. Përpara, pusetë!“, deklaroi Manchevski pas dhënies së Çmimit Grand Prix.

Në mbylljen solemne të festivalit çmimin e ngritën aktorët kryesorë në film Sara Klimoska, Filip Trajkoviq dhe producenti Jane Qortoshev.

Pas dhënies së çmimit, në skenë foli edhe producenti i filmit, i cili në emër të ekipit autor dhe producent falënderoi të gjithë ata që besuan në projekt dhe e mbështetën krijimin e tij:

„Në Tokio erdhëm me pusetë, dhe në Maqedoni kthehemi me këtë çmim të mrekullueshëm. Mendoj se kjo është një marrëveshje shumë e mirë! Nga pasiguria nëse do të arrinim fare të xhironim filmin, deri në këtë mbrëmje kur qëndrojmë këtu, në Tokio – kemi kaluar një rrugë të gjatë. Falënderime të mëdha për të gjithë ata që besuan në ne dhe na mbështetën në këtë rrugë. Galina Toneva, Ju-Fai Suen, Svetlana Leviçeva… – ja ku jemi. Falënderime për Festivalin Ndërkombëtar të Filmit në Tokio, që besoi në filmin tonë dhe për jurinë që i dha këtë çmim të mrekullueshëm. Arigato gozaimas!“, deklaroi Qortoshev.

Këtë vit, në Festivalin Ndërkombëtar të Filmit në Tokio (TIFF) arritën 1.892 filma nga 112 vende dhe rajone. Pas një procesi rigoroz seleksionimi, në programin konkurrues u përzgjodhën 15 filma. Juria e programit konkurrues, e udhëhequr nga regjisori australian Rolf de Heer, përbëhej nga profesionistë të filmit nga Australia, SHBA, Koreja e Jugut, Japonia dhe Franca.

„Motra, vëllai dhe puseta“ është një komedi e çuditshme për ata që kanë dhe ata që nuk kanë – njëkohësisht një satirë e ashpër dhe një poezi e hollë për një vëlla dhe motër që jetojnë në margjinat e shoqërisë. Një film për antiheronjtë që – në stilin e veçantë të Milço Manchevskit – refuzon çdo klasifikim gjenerik, duke sjellë lot dhe të qeshura. Edhe pse zhvillohet në Maqedoninë e sotme, filmi përmban një reflektim universal për mënyrën se si njerëzit jetojnë dhe lidhen në botën moderne.

Kjo është nëntëta lungmetrazhi i tij artistik. Në vitin 2026 ai realizoi edhe filmin dokumentar lungmetrazh „Njerëz të mirë“ për tragjedinë në Koçan, duke prezantuar kështu dy filma para publikut ndërkombëtar në të njëjtin vit.

Rolin kryesor e luajnë Sara Klimoska, Filip Trajkoviq, Sonja Mihajlova, Petar Mirçevski, Jordan Simonov, Dejan Lilic, Jasmina Vasileva, Stefan Nikolovski, si dhe Ana Kostovska, Ivan Gjoshevski, Viktor Arsov, Marina Pop Pankova, Aleksandar Stepanuleski dhe Marin Gavrilovski.

David Mans nga Mbretëria e Bashkuar është dizajner i produksionit. Drejtor fotografie është Stefano Falivene nga Italia. Drejtoresha e kastimit është Milka Ançevska, kostumet janë të Jaklina Krstevskës, ndërsa make-up-i i Bistra Keçidzhievës nga Bullgaria. Producent i filmit është Jane Qortoshev.

Filmi u xhirua me një ekip ndërkombëtar në lokacione në dhe rreth Shkupit. Koproducentë janë Gala Film nga Bullgaria, Sens Production nga Serbia, Amarcord Production dhe Augustus Color nga Italia, Berkeley Media Group nga Anglia dhe Tirana Film Institute nga Shqipëria.