Meloni: Marrëveshja e Trump me Putin është legjitimim i Moskës, bombat vazhdojnë të bien
Marrëveshja midis Donald Trump dhe Vladimir Putin për blerjen e naftës dizel ruse përbën një "zgjedhje shumë të rrezikshme" dhe do të thotë "legjitimim i Moskës ndërsa bombat e saj vazhdojnë të bien mbi qytetet ukrainase", deklaroi në Romë kryeministrja italiane Giorgia Meloni. Fjalët e saj u përshëndetën menjëherë në Kiev, ndërsa nga Moska erdhi një reagim i ashpër, transmeton "Euronews".
Meloni dha këto komente gjatë fjalimit para parlamentit, menjëherë para nisjes së saj për në një takim të Këshillit Evropian. Ajo paralajmëroi se një marrëveshje e tillë çon në "dobësim të heshtur të efektit të sanksioneve" – një veprim për të cilin theksoi se është në kundërshtim me të gjitha përpjekjet deri më tani, përfshirë ato të Shteteve të Bashkuara, për të detyruar Putin që të fillojë negociatat.
Reagime nga Kievi dhe Moska
Kryeministrja italiane mendon se presidenti rus "provokon Evropën sepse duhet të kthejë vëmendjen nga rrjedha e konfliktit dhe kërkon një armik të ri". Ajo theksoi se qëndrimi i Italisë për mbështetjen e Ukrainës mbetet i pandryshuar.
Presidenti ukrainas Volodymyr Zelenski, i cili ndodhej në vizitë në Londër, i falënderoi kryeministren Meloni përmes platformës "X" "për kuptimin se kush është agresori dhe çfarë do të thotë të ndërtohet një paqe dinjitoze dhe e qëndrueshme". Në një intervistë të dhënë në Mbretërinë e Bashkuar, Zelenski theksoi se është "dhimbshëm që presidenti Trump zgjedh anën tjetër".
Kjo deklaratë lidhet me refuzimin e pretenduar të rrjetit satelitor "Starlink" për të siguruar të dhëna mbi raketat ruse gjatë sulmeve të fundit ndaj Ukrainës. Reagimi nga Moska, megjithatë, ishte krejtësisht ndryshe. Zëdhënësja e Ministrisë së Jashtme ruse, Maria Zakharova, u tha shkurtimisht mediave italiane: "Kjo nuk është punë e saj".
