Negociata të mëdha në nëntor? Zelenski ka një kërkesë të veçantë

Ukraina pret bisedime trilaterale me Shtetet e Bashkuara dhe Rusinë në nëntor, ndërsa presidenti Volodymyr Zelenski deklaroi se në procesin diplomatik dhe në vendimet për përfundimin e luftës duhet të përfshihen edhe vendet evropiane.

Zelenski theksoi se Ukraina insiston që asnjë vend evropian të mos përjashtohet nga procesi i marrjes së vendimeve, transmeton "Ukrinform".

Sipas tij, Ukraina planifikon që në javët e ardhshme të krijojë kontakte të reja me vendet kyçe evropiane, duke vazhduar njëkohësisht koordinimin me SHBA dhe partnerët e tjerë për organizimin e takimeve diplomatike.

"Duhet të shpëtojmë jetë. Duhet të afrojmë paqen. Duhet të formësojmë politikën tonë ndaj Rusisë në një mënyrë që të nxisë interes për marrjen e hapave drejt deeskalimit. Nuk ka paqe pa presion. Paqja nuk vjen tek ata që janë të pafuqishëm", deklaroi Zelenski.