Persona të panjohur ushtruan presion mbi persona të palëvizshëm në një qendër gerontologjike në Mladenovac

Persona të panjohur hynë në qendrën gerontologjike në Mladenovac, ku është vendvotimi, dhe ushtruan presion të pa lejuar mbi votuesit, përfshirë edhe persona të palëvizshëm, njoftoi kryetari i Komisionit Republikan të Zgjedhjeve (KRZ), Vladimir Dimitrijeviq.

Sipas tij, personat u paraqitën si vëzhgues. Për incidentin menjëherë u njoftua policia, e cila doli në terren. Dimitrijeviq tha se më shumë informacione priten në konferencën e ardhshme për shtyp.

Ai shtoi se, sipas raporteve të komisioneve lokale zgjedhore dhe bordeve të votimit, votimi në përgjithësi po zhvillohet rregullisht. Janë regjistruar incidente dhe parregullsi të vogla, të cilat në shumicën e rasteve u zgjidhën nga bordet e votimit, dhe në rastet kur kjo nuk ishte e mundur, ndërhyri policia.

Dimitrijeviq bëri thirrje që qytetarët të heqin dorë nga aktivitete të pa lejuara edhe jashtë vendeve të votimit, duke theksuar se për këto raste masat kompetente i marrin policia dhe prokuroria.