Sanchez: Besimi në hekurudhat e shpejta është dëmtuar pas aksidentit

Kryeministri spanjoll Pedro Sanchez sot deklaroi se besimi i qytetarëve në sistemin e hekurudhave të shpejta është dëmtuar pas aksidentit serioz hekurudhor në provincën Toledo, dhe tha se detyra e qeverisë është të përcaktojë shkaqet e tragjedisë dhe të parandalojë përsëritjen e aksidenteve të ngjashme.

"Besimi në sistemin e hekurudhave të shpejta në vendin tonë është dëmtuar. Detyra e qeverisë nuk është vetëm të përcaktojë shkaqet e asaj që ka ndodhur, por edhe të ofrojë zgjidhje që të mos përsëritet një tragjedi e këtij shkalle", tha Sanchez pas takimit të Qendrës për Koordinimin e Situatave Emergjente (CECOPI) në Toledo, transmeton "Pais".

Ai vlerësoi se është e papranueshme që Spanja, e cila ka një rrjet të zhvilluar hekurudhash të shpejta, të përjetojë dy aksidente me numër të madh viktimash në të njëjtin vit.

Sanchez shtoi se ndër viktimat mund të jenë qytetarë nga madje 27 vende.

Kryetari i qeverisë rajonale të Kastilja-La Mancha, Emiliano Garcia-Page, njoftoi se niveli i gjendjes së emergjencës është ulur nga i dyti në të parin, që nënkupton tërheqjen graduale të pjesës së ekipeve shpëtuese dhe shërbimeve të tjera të angazhuara.

Në operacionin e shpëtimit morën pjesë më shumë se 1,300 anëtarë të shërbimeve të ndryshme.

Garcia-Page paralajmëroi se numri i viktimave mund të jetë më i madh, duke theksuar se 70 persona janë raportuar si të zhdukur, si dhe janë mbledhur 31 qese me pjesë të mbetjeve, që e komplikon më tej procesin e identifikimit.

Sipas të dhënave më të fundit, janë identifikuar 13 të vdekur, ndërsa familjet e tetë viktimave janë informuar për identitetin e tyre.

Ndërkohë, Partia Popullore opozitare (PP) kërkoi përcaktimin e përgjegjësisë politike të ministrit të transportit dhe mobilitetit të qëndrueshëm, Oscar Puente.

Zëdhënësja e partisë, Ester Munjos, vlerësoi se ministri duhet të japë dorëheqjen ose të shkarkohet.