Turqia ndalon aksesin në rrjetet sociale për fëmijët nën 15 vjeç
Në Turqi hyri në fuqi ndalimi i aksesit në rrjetet sociale për fëmijët nën 15 vjeç. Kontrolli i moshës për llogaritë ekzistuese të përdoruesve do të vazhdojë deri më 31 mars 2027, dhe gjatë periudhës së tranzicionit platformat gradualisht do të mbyllin profilet e fëmijëve, raporton "Anadolu".
Turqia në mes të tetorit ndaloi ofruesit e shërbimeve të rrjeteve sociale që të ofrojnë shërbime për të miturit nën 15 vjeç, në përputhje me rregulloret e reja të Drejtorisë për Sigurinë Kibernetike.
Në rregullore thuhet se ofruesit e shërbimeve "nuk mund t'u ofrojnë shërbime fëmijëve që nuk kanë mbushur 15 vjeç".
Përveç kësaj, platformat duhet të ofrojnë lloje të ndryshme shërbimesh dhe të marrin masat e nevojshme për mbrojtjen e përdoruesve mbi 15 vjeç. Kontrolli i moshës duhet të japë përparësi mbrojtjes së të dhënave personale, duke përdorur metoda që përcaktojnë nëse përdoruesi plotëson kushtin e moshës pa zbuluar identitetin e tij.
Për të pasur akses në rrjetet sociale, përdoruesit do të duhet të konfirmojnë moshën e tyre përmes platformës qeveritare për shërbime elektronike e-Devlet. Pas kontrollit, ata do të marrin një token digjital me informacion për moshën e tyre.
Personave nën 15 vjeç do t'u refuzohet aksesin, ndërsa adoleshentët nga 15 deri në 18 vjeç do të mund të përdorin rrjetet sociale, por me kufizime të caktuara.
Shkëmbimi i mesazheve do të jetë i mundur vetëm me profilet e miqve, transmetimet live do të ndalohen, dhe përdoruesit nuk do të shohin reklama të destinuara për të rritur.
