(Video) Mësuese në Gjermani ishte në pushim mjekësor për 17 vjet, ndërsa merrte pagë: përballet me dënim të mundshëm me burg
Një mësuese nga Duisburgu, Gjermani, është nën hetim nga prokuroria për dyshimin e mashtrimit, pasi ka kaluar pothuajse 17 vjet në pushim mjekësor të pandërprerë, duke marrë pagë të plotë, raporton „Welt“.
Prokuroria kompetente ka nisur procedurë kundër saj pasi u zbulua se, si punonjëse shtetërore, ajo ka marrë pagë të plotë për pothuajse 17 vjet, pa mbajtur asnjë orë mësimi gjatë gjithë kësaj periudhe.
Përballet me dënim të mundshëm me burg
Si pasojë e kësaj, autoritetet rajonale urdhëruan pensionimin e saj të detyrueshëm. Megjithatë, mësuesja kundërshton këtë vendim dhe ka paraqitur padi në Gjykatën Administrative në Düsseldorf. Qëllimi i saj është të vazhdojë të marrë pagën e plotë (si të ishte e punësuar aktive), në vend të pensionit standard – i cili në rastin e saj do të ishte afërsisht 4,000 euro në muaj.
Prokuroria kërkon dënim me burg, si dhe kthimin e 248,000 eurove, të cilat ajo dyshohet se i ka përvetësuar në mënyrë të paligjshme.
Hetimi komplikohet më tej për shkak të aktiviteteve të saj afariste; megjithëse zyrtarisht është shpallur e paaftë për punë, ajo ka zhvilluar produkte kozmetike – një iniciativë për të cilën madje ka marrë edhe një çmim për sipërmarrje.
Kjo çështje ka tërhequr vëmendje të madhe në publik, pjesërisht për shkak të situatës më të gjerë në Duisburg. Qyteti për vite me radhë përballet me mungesë serioze të stafit mësimor në 128 shkollat e tij, që shërbejnë rreth 70,000 nxënës. Për të tërhequr mësues të rinj, autoritetet lokale po zhvillojnë fushata të veçanta që përfshijnë ture prezantuese të qytetit dhe stimuj, si akomodim falas i përkohshëm.
