Andonovski nga Seuli: Qasja ndaj inteligjencës artificiale do të përcaktojë përparimin e individit dhe shoqërisë
Ministri i transformimit digjital, Stefan Andonovski, po udhëheq delegacionin maqedonas në Samitin Global për inteligjencën artificiale në Seul, Republika e Koresë. Andonovski u drejtua në Takimin Ministror në kuadër të Samitit Global dhe bëri thirrje qeverive që të sigurojnë një nivel bazë të qasjes falas në mjete të dobishme të inteligjencës artificiale, duke filluar nga arsimi, zhvillimi i aftësive dhe qasja në shërbimet publike.
Në fjalimin e tij, Andonovski paralajmëroi se ekziston rreziku që inteligjenca artificiale të thellojë hendekun midis vendeve më të pasura dhe ekonomive në zhvillim, si dhe midis qytetarëve me të ardhura të ndryshme.
"Vendet që kanë burime për të investuar në mjete të avancuara, kapacitete llogaritëse dhe aftësi mund të përparojnë me shpejtësi, ndërsa ekonomitë në zhvillim do të mbeten prapa. Talenti ekziston në çdo shtet, por mundësia për t'u qasur në inteligjencën artificiale nuk është e barabartë për të gjithë", theksoi Andonovski.
Ministri theksoi se disponueshmëria e inteligjencës artificiale duhet të bëhet një prioritet i qartë zhvillimor, dhe si mekanizma të mundshëm përmendi përdorimin e përbashkët të burimeve llogaritëse, qasjen rajonale dhe programet kombëtare të zhvillimit.
Në këtë kontekst, Andonovski prezantoi rëndësinë e "Vezilkës", antenës maqedonase të lidhur me fabrikat evropiane të inteligjencës artificiale. Përmes saj, kompanitë dhe institucionet publike lidhen me burime superkompjuterike evropiane, marrin mbështetje për zhvillimin e zgjidhjeve praktike dhe krijohen modele gjuhësore dhe grumbuj të të dhënave në gjuhën maqedonase.
Duke u ndalur te sovraniteti i të dhënave, ministri theksoi se ai nënkupton aftësinë e shtetit për të zhvilluar dhe zgjeruar zgjidhjet e veta digjitale, për të mbrojtur informacionet e qytetarëve dhe për të bashkëpunuar me besim me partnerët ndërkombëtarë.
"Mundësia për të përfituar nga përparësitë e inteligjencës artificiale nuk duhet të varet nga pasuria e një shteti apo nga të ardhurat e një familjeje", përfundoi Andonovski.
Në margjinat e samitit, ministri Andonovski do të zhvillojë edhe takime bilaterale me zëvendëspresidentin e Bankës Botërore, përfaqësues të Republikës së Koresë dhe kolegë ministra, ku do të diskutojë për thellimin e bashkëpunimit në transformimin digjital dhe inteligjencën artificiale.
