Gerasimovski: Centar është lider në tranzicionin lokal energjetik, deri në fund të mandatit të gjitha objektet arsimore do të pajisen me centrale fotovoltaike

Kryetari i Komunës Centar, Goran Gerasimovski, mori pjesë në panel-diskutimin „Kush formëson tranzicionin e drejtë të gjelbër“, në kuadër të Forumit socio-ekologjik të organizuar nga Fondacioni „Friedrich Ebert“, ku prezantoi politikat lokale dhe hapat konkretë që po ndërmerr komuna për tranzicionin energjetik, mbrojtjen e hapësirave të gjelbra dhe përmirësimin e hapësirave publike.

Ai theksoi se komuna me themelimin e „Energjia Centar“ në vitin 2023, ndërmarrja e parë komunale në shtet për prodhimin dhe shitjen e energjisë elektrike nga burime të ripërtëritshme, u bë lider në procesin e transformimit energjetik.

„Ne tashmë kemi instaluar centrale fotovoltaike në kopshtin e fëmijëve „Korchagin“, dega „Pepelashka“, si dhe në shkollat fillore „Kiro Gligorov“ dhe „Shën Kirili dhe Metodi“. Objekti i radhës është shkolla fillore „Dimitar Miladinov“, ku pas përfundimit të rikonstruksionit të çatisë do të instalohen centrale fotovoltaike. Qëllimi ynë është që deri në fund të mandatit të gjitha objektet arsimore nën kompetencën e Komunës Centar të pajisen me centrale fotovoltaike“, theksoi Gerasimovski.

Kryetari theksoi se tranzicioni i gjelbër nënkupton edhe hapësira publike të aksesueshme për të gjithë, përfshirë personat e moshuar, personat me aftësi të kufizuara dhe prindërit me karroca për fëmijë. Prandaj, qytetarët duhet të përfshihen që në fazën e planifikimit, e jo vetëm të konsultohen pasi projektet të jenë përgatitur.

Komuna Centar disponon gjithashtu me Kadastrin e Gjelbër dhe portalin GIS, përmes të cilëve regjistrohet, monitorohet dhe planifikohet hapësira e gjelbër bazuar në të dhëna konkrete. Këto mjete mundësojnë një pamje më të mirë të gjendjes së hapësirave të gjelbra dhe planifikim më të përgjegjshëm për mbrojtjen dhe përmirësimin e tyre.

„Tranzicioni i gjelbër nuk është vetëm çështje e ekologjisë dhe energjisë. Ai është çështje e barazisë, aksesueshmërisë dhe cilësisë së jetës. Nëse duam një qytet vërtet të gjelbër dhe të drejtë, duhet ta ndërtojmë së bashku me qytetarët, e jo vetëm për ta“, përfundoi Gerasimovski.