Sekuestruar dy ton ushqim nga tregu i gjelbër në Çento

Agjencia për Ushqim dhe Veterinari (AUV), në bashkëpunim me Inspektoratin Komunal të Qytetit të Shkupit dhe Inspektoratin Shtetëror të Tregut, sot realizoi një kontroll të jashtëzakonshëm inspektues në tregun e gjelbër në lagjen Çento të Shkupit, ku u sekuestruan rreth dy ton ushqim i pasigurt nga lloje të ndryshme.

Kontrolli ishte i fokusuar në verifikimin e kushteve nën të cilat shitet ushqimi, si dhe respektimin e rregullave ligjore për ruajtjen dhe qarkullimin e sigurt të tij.

Gjatë kontrollit u konstatua se ushqimi shitej jashtë vendeve të parashikuara për këtë qëllim brenda tregut, në kushte jo higjenike, duke rritur kështu rrezikun për sigurinë e tij dhe për shëndetin e konsumatorëve. Ushqimi i sekuestruar është hequr nga qarkullimi. Shërbimet inspektuese kompetente do të vazhdojnë me marrjen e masave në përputhje me kompetencat e tyre ligjore.

Agjencia për Ushqim dhe Veterinari, siç njoftuan nga aty, do të vazhdojë me realizimin e kontrolleve të shtuar inspektuese, vetë dhe në koordinim me institucionet e tjera kompetente, me qëllim mbrojtjen e shëndetit të qytetarëve dhe sigurimin e ushqimit të sigurt në treg.

AUV apelon te të gjithë operatorët e ushqimit që të respektojnë detyrimet ligjore dhe të sigurojnë kushte të përshtatshme higjienike gjatë trajtimit, ruajtjes dhe shitjes së ushqimit. „Siguria e ushqimit dhe mbrojtja e shëndetit të konsumatorëve mbeten prioritet në punën e Agjencisë për Ushqim dhe Veterinari“.