Siljanovska-Davkova pranoi letrat akreditive të ambasadorit të ri grek, Ioanis Malukos: u mor premtim për mbështetje të fortë të rrugës maqedonase drejt BE-së

Kryetarja Gordana Siljanovska-Davkova sot pranoi letrat akreditive të ambasadorit të ri të jashtëzakonshëm dhe të autorizuar të Republikës Helene, Ioanis Malukos.

Ajo, duke e trajtuar Greqinë si një fqinj të rëndësishëm dhe partner potencial strategjik, shprehu pritje të sinqertë për hapjen e një kapitulli të ri në marrëdhëniet ndërmjet dy vendeve, në frymën e fqinjësisë së mirë, të ndërtuar përmes politikës bona fide.

Për Siljanovska-Davkovën, Republika Helene, si vendi në rajon me përvojën më të gjatë në Bashkimin Evropian, ka përgjegjësi historike dhe politike për integrimin evropian të vendeve të Ballkanit Perëndimor.

Në prag të kryesimit grek të Këshillit të BE-së në gjysmën e dytë të vitit 2027, ajo pret një angazhim të shtuar grek i cili do të jetë i përqendruar në përmbushjen e premtimeve nga Agjenda e Selanikut në vitin 2003.

Lidhur me bashkëpunimin ekonomik, kryetarja theksoi Korridorin 10 dhe ndërkonjktorin e gazit si projekte me rëndësi strategjike për të dy vendet, për shkak të kontributit të garantuar të sigurt drejt lidhshmërisë më të madhe, zhvillimit ekonomik dhe sigurisë rajonale energjetike.

Kryetarja përshëndeti iniciativën greke për regjistrimin e rajonit të Prespës në listën e trashëgimisë botërore të UNESCO-s, për shkak të vlerës së tij të jashtëzakonshme natyrore dhe kulturore.

Ajo beson fuqishëm në fuqinë e diplomacisë kulturore, e udhëhequr nga suksesi fantastik i interpretimit greko-bullgaro-maqedonas të kantatës skenike "Carmina Burana".

Ambasadori Malukos shprehu gatishmërinë për fqinjësi të mirë, të ndërtuar përmes dialogut politik konstruktiv dhe respektimit të përkushtuar të së drejtës ndërkombëtare.

Ai premtoi mbështetje të fortë greke për rrugën maqedonase drejt BE-së, duke informuar se zgjerimi i Bashkimit me vendet e Ballkanit Perëndimor do të jetë prioritet i agjendës greke gjatë kryesimit.

Prania e kompanive greke në vend, ambasadori e vlerësoi si një urë të rëndësishme ekonomike.

Siljanovska-Davkova përcolli përshëndetje të ngrohta për presidentin grek, Konstantinos Tasulas, dhe për popullin grek.

Në fund, ambasadorit Malukos i dëshiroi shëndet të mirë dhe punë të suksesshme.