Vaksinimi kundër gripit sezonal do të fillojë nga gjysma e dytë e tetorit

Ministri i Shëndetësisë, Sašo Klekovski, informoi se këtë vit Organizata Botërore e Shëndetësisë ka ndryshuar të tre llojet në përbërjen e rekomanduar të vaksinës kundër gripit sezonal për hemisferën veriore.

-Një ndryshim i tillë i njëkohshëm është i pazakontë dhe ka shkaktuar vonesa në prodhim tek prodhuesit në nivel global. Për këtë arsye, në shumë vende të Evropës dhe rajonit fillimi i vaksinimit pritet në nëntor. Në vendin tonë tenderi për furnizim me vaksina zakonisht publikohet në periudhën qershor–gusht, pas publikimit të llojeve nga OBSH-ja. Në tenderin e publikuar këtë vit nuk u paraqit asnjë ofertues. Ministria menjëherë ndërmori masa për sigurimin e vaksinave në mënyrë tjetër. Në tre sezonet e fundit vaksinimi në vendin tonë fillonte në periudhën nga 16 deri më 25 tetor. Ministria e Shëndetësisë do të jetë e përgatitur që vaksinimi të fillojë edhe këtë sezon në të njëjtën periudhë. Nga 80.000 dozat e planifikuara, 56.000 vaksina janë tashmë të sigurta ose janë në proces sigurimi, ndërsa aktivitetet për sigurimin e sasive të mbetura vazhdojnë, theksoi ministri Klekovski.

Vaksina falas është e destinuar për grupet prioritare: persona mbi 65 vjeç, kronikë, gra shtatzëna dhe punonjës shëndetësorë. Qytetarët do të informohen në kohë për fillimin e vaksinimit dhe mënyrën e caktimit të terminit.