BE-ja i premtoi Ukrainës 45 miliardë euro, tani kërkon fonde shtesë nga vende të tjera

Bashkimi Evropian po përpiqet të sigurojë fonde shtesë për Ukrainën në takimet e Fondit Monetar Ndërkombëtar (FMN) dhe grupit G7 këtë javë, pasi vendi përballet me mungesë të fondeve financiare për vitin 2027. Këtë e konfirmoi komisioneri evropian për ekonomi, Valdis Dombrovskis, transmeton "Reuters".

Financimi për Ukrainën për vitin 2026 është siguruar, dhe rreth 31 miliardë euro nga BE-ja presin të paguhen. Kusht për pagesën është që Kievi të miratojë më parë reformat e dakorduara.

Edhe pse Bashkimi tashmë ka premtuar 45 miliardë euro për vitin 2027, nevojat financiare të Ukrainës do të jenë dukshëm më të mëdha. Prandaj BE-ja po përpiqet të sigurojë fonde shtesë nga partnerë si Norvegjia, Zvicra, Kanadaja, Japonia dhe Mbretëria e Bashkuar.

"Kjo është një nga temat për të cilat diskutojmë në takimet e FMN-së dhe G7, ku përpiqemi të mobilizojmë mbështetje nga partnerët e tjerë", tha Dombrovskis në margjinat e takimit në Bangkok.

"Që nga fillimi kemi theksuar se Bashkimi Evropian ka qëllim të mbulojë rreth dy të tretat e nevojave financiare të Ukrainës, dhe nga partnerët e tjerë presim që të mbulojnë pjesën tjetër", shtoi ai.

BE-ja planifikon që pjesën më të madhe të 45 miliardëve euro të parashikuar për vitin e ardhshëm t’i paguajë paraprakisht, me qëllim që t’u japë kohë partnerëve të tjerë të përfshihen në financim. Situatën e komplikon më tej fakti që Bashkimi ende po përcakton shumën e saktë që do t’i nevojitet Ukrainës në vitin 2027.

Dombrovskis paralajmëroi edhe për problemet me dorëzimin e ndihmës ushtarake.

"Duhet të theksohet se ekziston një diferencë midis ndihmës ushtarake që disa anëtarë të NATO-s i kanë premtuar Ukrainës dhe asaj që është dorëzuar realisht. Ulja e kësaj diference do të ndihmonte shumë në përmbushjen e nevojave ushtarake financiare të Ukrainës", tha ai.

Si shembull pozitiv ai përmendi Norvegjinë, e cila ka njoftuar ndihmë shtesë prej nëntë miliardë eurosh për vitin e ardhshëm.

"Norvegjia premtoi nëntë miliardë euro shtesë për vitin e ardhshëm. Një shumë të ngjashme siguroi edhe këtë vit, që është me të vërtetë e rëndësishme", theksoi Dombrovskis.

Kur u pyet nëse edhe partnerët e tjerë ndihmojnë, por jo mjaftueshëm, ai u përgjigj:

"Sinqerisht, po."