Klekovski për Mihajllovën: arratisja është për shkak të ardhjes së konsiliumit bullgar, nuk ka rast shëndetësor

Ministri i Shëndetësisë, Sašo Klekovski, mendon se e akuzuara për aksidentin rrugor me një të vdekur, Iva Mihajllova, u arratis sepse mjekë bullgarë që mund të konfirmonin se ajo nuk ka rast shëndetësor, po vijnë në Koçan. Klekovski njoftoi se do të udhëtojë në Sofje dhe atje do të bisedojë edhe për këtë rast.

„Unë mendoj se arratisja është për shkak të ardhjes së konsiliumit bullgar këtu. Ai duhej së bashku me mjekët maqedonas të verifikonte gjetjet e personave, dhe mendoj se atëherë do të dilnin në shesh gjërat se si janë. Unë po udhëtoj në Sofje, padyshim do të bisedoj me ministrinë e tyre për këtë sepse në thelb aty nuk ka rast shëndetësor“, tha ministri Klekovski sot pas vizitës në spitalin në Shtip.

Iva Mihajllova fundjavën e kaluar u arratis në Bullgari dhe për mediat atje tha se erdhi për trajtim pas aksidentit të tetorit të kaluar në të cilin vdiq një person, dhe disa të tjerë u lënduan, pavarësisht ndalimit për të dalë nga shteti. Prokuroria e ndjek sepse në rrugën Koçan – Shtip kaloi në korsinë e kundërt, dhe me shpejtësi të madhe goditi automjetin në të cilin ishte i ndjeri.

MPB-ja për Mihajllovën shpalli urdhër-arrest qendror dhe ndërkombëtar, ndërsa gjykata në Koçan i caktoi 30 ditë paraburgim.