Lafçiski në dorëzimin e detyrës komandant i misionit „KFOR“ në Kosovë

Kryetari i Shtabit të Përgjithshëm të Ushtrisë, gjeneral-major Sashko Lafçiski, me ftesë të komandantit të Komandës së Përbashkët të forcave aleate të NATO-s në Napoli (JFCNP), admiral George M. Wikoff, sot mori pjesë në ceremoninë solemne për dorëzimin e detyrës komandant të misionit „KFOR“, e cila u mbajt në komandën kryesore të misionit në kampin „Film City“ në Prishtinë.

Në ceremoninë, që u drejtua nga admirali Wikoff, komandanti deri tani, gjeneral-major Ozkan Ulutaş i dorëzoi detyrën gjeneral-majorit Roberto Vergori.

Gjatë vizitës, gjenerali Lafçiski zhvilloi takime me komandantin e Komandës së Përbashkët të forcave aleate të NATO-s në Napoli (JFCNP), admiral George M. Wikoff, komandantin e Komandës Operative të Italisë, gjeneral-lejtnant Giovanni Maria Januci dhe komandantin e Korpusit të Shpejtë të NATO-s në Itali (NRDC-ITA), gjeneral-lejtnant Gianluca Karai. Në takime u theksua rëndësia e veprimit të përbashkët dhe koordinimit midis vendeve aleate që mbeten të përkushtuara fuqishëm ndaj sigurisë kolektive dhe forcimit të kapaciteteve mbrojtëse në zonën e përgjegjësisë.

Gjatë qëndrimit, gjenerali Lafçiski vizitoi pjesëtarët e kontingjentit maqedonas që kryejnë aktivitete në rajonin e Deçanit dhe Komandën Rajonale – Perëndim, Pejë, ku zhvilloi takim edhe me komandantin, kolonel Giuseppe De Balzi. Në këtë rast u theksua profesionalizmi i lartë, përkushtimi dhe kontributi i pjesëtarëve të Ushtrisë në kryerjen e detyrave, si dhe bashkëpunimi i shkëlqyer midis Ushtrisë dhe forcave të KFOR-it. Në takimin me paqeruajtësit, gjenerali Lafçiski u informua drejtpërdrejt për sfidat aktuale në kryerjen e detyrave të tyre, duke u dhënë mesazh që të vazhdojnë t’i përfaqësojnë me dinjitet dhe profesionalizëm Ushtrinë dhe shtetin në këtë mision ndërkombëtar.

Ushtria e Republikës së Maqedonisë së Veriut është pjesë e misionit „KFOR“ që nga nëntori i vitit 2020. Aktualisht, kontingjenti maqedonas përbëhet nga dy skuadra të vendosura në Komandën Rajonale – Perëndim dhe oficerë të stafit në komandën e misionit në Prishtinë.