Gerasimovski: Ligji na detyron të fillojmë procedurën për DUP „Barutana“, por kjo nuk do të thotë se plani do të miratohet

Kryetari i Komunës Qendër, Goran Gerasimovski, në briefingun e sotëm me gazetarët sqaroi se procedura për përgatitjen e Planit Detal Urbanistik të ri për "Barutana" është filluar në përputhje me detyrimet ligjore të Komunës, pasi plani paraprak u shfuqizua nga Gjykata Kushtetuese në vitin 2025.

Ai theksoi se në publik është krijuar një fushatë e panevojshme rreth draft-planit, pa bërë dallimin mes detyrimit ligjor për zhvillimin e procedurës dhe vendimit përfundimtar për miratimin e planit.

"Në publik u ngrit një fushatë e madhe, dhe ajo që qytetarët duhet ta dinë është se ne kemi detyrim ligjor të fillojmë procedurën për përgatitjen e një DUP të ri. Sipas nenit 23 paragrafi 2 i Ligjit për planifikim urbanistik, pas shfuqizimit të planit paraprak nga Gjykata Kushtetuese, Komuna është e detyruar të fillojë procedurën për përgatitjen dhe miratimin e planit të ri, me afat ligjor prej 18 muajsh. Por fakti që kemi filluar procedurën dhe draft-plani po kalon nëpër procedurat ligjore, aspak nuk do të thotë se ai do të miratohet në formën e propozuar. Pikërisht për këtë ekzistojnë konsultimet publike, mendimet profesionale dhe të gjitha mekanizmat ligjorë për shqyrtimin e vërejtjeve", theksoi Gerasimovski.

Kryetari i komunës theksoi se me draft-DUP-in e propozuar nuk parashikohet urbanizim i sipërfaqeve të reja, por rregullim i hapësirës që tashmë është përfshirë në dokumentacionin ekzistues planifikues.

"Kjo nuk është një zonë e re ndërtimore. Për këtë hapësirë ekziston dokumentacion planifikues në nivel të planit detajuar që nga viti 2002, dhe me Planin Gjeneral Urbanistik të vitit 2012, lokaliteti "Barutana", brenda lagjes urbane J05, është përcaktuar si pjesë e zonës ndërtimore. GJU-ja vendos parametrat bazë, ndërsa Komuna ka detyrimin t'i respektojë ato gjatë përgatitjes së planeve detajuar urbanistike", shpjegoi Gerasimovski.

Ai theksoi se draft-plani i propozuar, në krahasim me dokumentacionin planifikues paraprak, parashikon një ulje të konsiderueshme të volumit të lejuar të ndërtimit.

"Në vend të 43.429 metrave katrorë aktualë, me draft-planin parashikohen 29.459 metra katrorë për banim, që përbën një ulje prej 33 përqind. Ndërtimi maksimal kufizohet në 40 përqind të parcelës, sipërfaqet e gjelbra rriten në 40 përqind, dhe lejohet vetëm një nivel nëntokësor. Këto janë kushte shumë më restriktive se më parë", tha Gerasimovski.

Kryetari i komunës shpjegoi se në planet detajuar urbanistike paraprake nuk kishte kufizim të numrit të niveleve nëntokësore, gjë që në raste të caktuara ka mundësuar keqpërdorime.

"Kemi pasur situata ku nivelet nëntokësore, në vend të përdorimit për parkim dhe hapësira ndihmëse, praktikisht janë përdorur si kate shtesë. Me draft-planin e ri parashikohet vetëm një nivel nëntokësor, dhe nëse ai është i hapur nga disa anë, llogaritet si kat mbi tokë. Qëllimi është të parandalohen këto praktika dhe të vendosen rregulla të qarta", theksoi ai.

"Nuk mund të lejojmë që urbanizmi të reduktohet në ndërtim të pa-planifikuar dhe kaotik. Sidomos kur bëhet fjalë për Vodno, duhet të jemi të kujdesshëm dhe të marrim parasysh të gjitha aspektet, nga siguria e terrenit deri te mbrojtja e mjedisit. Qëllimi ynë nuk është të miratojmë planin me çdo kusht, por të gjejmë një zgjidhje ligjore dhe të sigurt", theksoi kryetari i komunës.

Ai informoi se Komisioni për urbanizëm i Qytetit të Shkupit ka dhënë mendim pozitiv për përputhshmërinë e draft-planit me Planin Gjeneral Urbanistik, dhe në procedurë janë përfshirë edhe institucionet dhe ndërmarrjet komunale përgjegjëse.

Gjithashtu, Gerasimovski theksoi se pas vërejtjeve të marra në anketën e parë publike do të organizohet edhe një anketë e dytë publike, pas së cilës plani do të dërgohet përsëri për shqyrtim te institucionet përgjegjëse, përfshirë Qytetin e Shkupit dhe Ministrinë e Transportit.

"Dua që qytetarët të jenë të qetë. Asgjë nuk është vendosur paraprakisht dhe asgjë nuk do të miratohet me forcë. Procedura duhet të zhvillohet në përputhje me ligjin, por kjo nuk do të thotë se çdo plan i propozuar duhet të miratohet. Të gjitha vërejtjet do të shqyrtohen, dhe për Vodnon do të kërkohet një zgjidhje ligjore, e sigurt dhe në interes të qytetarëve", përfundoi Gerasimovski.