MPB me detaje për rastin me sulmin e pretenduar ndaj të rinjve nga ana e policëve
MPB ka ngritur padi penale kundër tre personave për kryerjen e veprave penale "pengimi i personit zyrtar në kryerjen e veprës zyrtare" dhe "prodhimi dhe futja në qarkullim pa leje e drogërave narkotike, substancave psikotrope dhe prekursorëve" në lidhje me ngjarjen që ndodhi më 7 tetor, në të cilën policët dyshohet se kanë rrahur brutalisht dy të rinj.
Pas publikimeve se më 7 tetor në rajonin e Shkupit, dy persona janë sulmuar fizikisht nga punonjës policie gjatë veprimeve të tyre, ku sipas pretendimeve të tyre u është dëmtuar edhe makina, ministri i Punëve të Brendshme urdhëroi Departamentin për Kontroll të Brendshëm, Hetime Kriminale dhe Standardet Profesionale të hetojë rastin.
"Në lidhje me ngjarjen penale, e cila ndodhi më 07.10.2026 rreth orës 20:25 në rrugën „Crnogorska“ në Shkup, ku gjatë pritës së një automjeti pasagjerësh „BMW“ me targa të Shkupit, dhe pas marrjes së informacioneve operative se do të kryhej një vepër penale sipas nenit 215, shitblerja e marihuanës, menjëherë pas marrjes së informacionit u ndërmorën masa të përshtatshme dhe nga ana e punonjësve policorë u dha shenjë për ndalimin e automjetit pasagjerë „BMW“.
Pasi punonjësit policorë iu drejtuan automjetit për identifikim dhe kontroll, drejtuesi ndezi automjetin, duke goditur një shtyllë dhe në të njëjtën kohë hodhi përmes dritares një qese me marihuanë. Në atë moment një nga punonjësit policorë nxori pistoletën e tij zyrtare dhe nga ana e pasagjerit në dritaren gjysmë të hapur dha urdhrin "ndal policia", ku nga ana e personit nga ana e pasagjerit iu mor pistoleta zyrtare, ndërsa drejtuesi ndezi automjetin dhe u largua në arrati", njoftoi MPB.
Punonjës policorë të vendosur në afërsi u nisën pas automjetit që po lëvizte me shpejtësi të madhe në rrugën „Gjorgje Petrov“ drejt autostradës Shkup-Tetovë, duke injoruar sinjalet zanore dhe dritore të punonjësve policorë, dhe nga një punonjës policor u qëlluan edhe tre predha paralajmëruese në ajër.
Në një moment automjeti „BMW“ goditi bankinën e autostradës dhe u përmbys, pas së cilës nga automjeti dolën drejtuesi P.A.(24) dhe pasagjeri E.P.(21). Personat u arrestuan, arma u sekuestrua, dhe pas kontrollit në terren u gjet një qese me marihuanë.
Sot është ngritur padi penale kundër E.P. dhe P.A. për kryerjen e veprës penale "pengimi i personit zyrtar në kryerjen e veprës zyrtare" dhe "prodhimi dhe futja në qarkullim pa leje e drogërave narkotike, substancave psikotrope dhe prekursorëve", ndërsa kundër M.T., për të cilin ekzistojnë informacione se është i lidhur me rastin, është ngritur padi penale për veprën penale "prodhimi dhe futja në qarkullim pa leje e drogërave narkotike, substancave psikotrope dhe prekursorëve".
Gjithashtu, thonë nga MPB, për ngjarjen është njoftuar Departamenti për Kontroll të Brendshëm, Hetime Kriminale dhe Standardet Profesionale pranë MPB-së, i cili ndërmerr masa dhe aktivitete në lidhje me mundësitë e parregullsive gjatë veprimeve të punonjësve policorë në këtë rast.
