Formula 1 kthehet në Afrikë

Formula 1 njoftoi se është arritur një marrëveshje dhjetëvjeçare për organizimin e Çmimit të Madh të Afrikës në Ruandë, i cili pritet të hyjë në kalendar në fillim të dekadës së ardhshme.

Kjo do të shënojë rikthimin e kampionatit në kontinentin afrikan për herë të parë që nga viti 1993 dhe një garë në pistën Kyalami në Afrikën e Jugut.

Gara e parë do të mbahet pas përfundimit të pistës së re në Bugesera, rreth 40 kilometra në jug të Kigali-t, pranë aeroportit të ri ndërkombëtar.

Viti i saktë i edicionit të parë ende nuk është konfirmuar, njoftoi Formula 1.

Pista do të ndërtohet sipas standardeve më të larta të FIA-s, dhe ndryshimet natyrore në lartësinë mbi nivelin e detit pritet të kontribuojnë në konfigurimin e kërkuar.

Projekti përfshin gjithashtu zhvillimin e infrastrukturës turistike, sportive dhe biznesore.

"Sot është një moment historik për Formula 1", tha presidenti dhe drejtori ekzekutiv i kampionatit, Stefano Domenicali.

Me ardhjen në Ruandë, Formula 1 do të ketë gara në çdo kontinent të banuar.
Organizatorët theksojnë se tashmë ka më shumë se 100 milionë tifozë të këtij sporti në Afrikë, prandaj rikthimi përbën një hap të rëndësishëm në zgjerimin e kampionatit.

Detajet për datën e garës së parë, ndërtimin e pistës dhe programin e fundjavës së garës do të publikohen më vonë.