Transfer spektakolar në pritje: Mesi kthehet në shtëpi

Lionel Mesi mund të bëjë një nga lëvizjet më emocionuese në karrierën e tij në fillim të vitit 2027. Futbollisti argjentinas thuhet se është më afër se kurrë për t'u rikthyer te Njuels Old Bojs, klubi ku nisi rrugëtimin e tij futbollistik si djalë, para se të transferohej te Barcelona dhe të bëhej një nga lojtarët më të mirë të të gjitha kohërave.

Edhe pse ka një kontratë me Inter Majami deri në fund të vitit 2028, po rriten spekulimet se Lionel Mesi mund të kthehet në Argjentinë që në janar 2027.

Sipas informacioneve të publikuara nga argjentinasit e "Estadio 3", legjenda e futbollit nuk ka qenë kurrë kaq afër transferimit te Njuels Old Bojs, klubi nga qyteti i tij i lindjes, Rosario, ku luajti në kategoritë e të rinjve.

Nëse një skenar i tillë realizohet, do të ishte një nga transferimet më interesante të viteve të fundit, jo aq për shkak të parave apo ambicieve sportive, por për shkak të lidhjes emocionale të Mesit me klubin nga ku gjithçka filloi.

Njuels Old Bojs zë një vend të veçantë në jetën e asit argjentinas. Si djalë, Mesi stërvitej në akademinë e të rinjve të klubit nga Rosario, para se të transferohej me familjen në Spanjë dhe të bashkohej me Barcelonën.

Në gjigantin katalanas ai ndërtoi karrierën që e çoi ndër më të mëdhenjtë në historinë e futbollit. Megjithatë, pavarësisht të gjitha trofeve dhe njohjeve individuale, ai kurrë nuk luajti për ekipin e parë të Njuels.

Prandaj rikthimi i mundshëm në Rosario do të kishte një simbolikë të veçantë. Do të ishte një mundësi për të mbajtur fanellën e klubit ku bëri hapat e tij të parë, në fund të karrierës.

Pengesa më e madhe për një transferim të mundshëm është kontrata që Mesi ka me klubin amerikan. Argjentinasi është i lidhur me Inter Majamin deri më 31 dhjetor 2028, që do të thotë se një transferim i mundshëm te Njuels do të duhej të negociohej me drejtuesit e klubit të MLS.

Derisa nuk ka konfirmim zyrtar se negociatat kanë nisur, as nuk dihet nëse do të diskutohet për transferim, huazim apo ndonjë model tjetër bashkëpunimi.

Sidoqoftë, si datë e mundshme përmendet janari 2027, që përkon me fillimin e sezonit të ri të kampionatit argjentinas.

Mesi mbërriti te Inter Majami në verën e vitit 2023, pasi la Paris Sen Zhermenin. Sipas statistikave, sulmuesi argjentinas ka luajtur 122 ndeshje për klubin amerikan në të gjitha garat, ka shënuar 106 gola dhe ka regjistruar 58 asistime.

Edhe pse ka hyrë në vitet e veteranisë, performancat e tij tregojnë se ende mund të bëjë diferencën në fushë.

Sipas të dhënave të "Transfermarkt", vlera e tij në treg vlerësohet në 15 milionë euro.

Foto/ Depositphotos