Sllovenët e duan inteligjencën artificiale – dy të tretat përdorin AI

Dy të tretat e popullsisë në Slloveni dhe rreth 40 për qind e kompanive kanë përdorur mjete për inteligjencë artificiale (AI) në tremujorin e parë të këtij viti, njoftoi Instituti Kombëtar i Statistikave.

Afërsisht 90 për qind e të anketuarve deklaruan se janë të njohur me inteligjencën artificiale – një shifër që është 19 pikë përqindjeje më e lartë krahasuar me të njëjtën periudhë të vitit të kaluar, raportoi agjencia e lajmeve STA.

Mjete si ChatGPT, Copilot, Gemini, DeepL ose Grok janë përdorur nga 62 për qind e banorëve të moshës 16 deri në 74 vjeç. Kjo përbën një rritje prej 24 pikë përqindjeje krahasuar me vitin e kaluar, ose një trefishim të nivelit të përdorimit.

Hulumtimi tregon se pjesa më e madhe e përdoruesve të tillë është midis të rinjve (90 për qind), ndërsa më e vogla është midis personave të moshës 65 deri në 74 vjeç.

Gratë përdorin më shpesh mjetet për inteligjencë artificiale (64 për qind) sesa burrat (59 për qind). Madje 93 për qind e nxënësve dhe studentëve – nga shkolla fillore deri në universitet – kanë përdorur këto mjete, krahasuar me 71 për qind të të punësuarve dhe 30 për qind të pensionistëve.

Shumica e njerëzve (90 për qind) përdorin mjetet AI për qëllime personale, ndërsa më shumë se një e treta (37 për qind) i përdorin për punë.

Sa i përket bizneseve, 38 për qind e tyre kanë përdorur inteligjencë artificiale në tremujorin e parë të këtij viti, që përbën një rritje prej 16 pikë përqindjeje krahasuar me vitin e kaluar. Përdorimi i këtyre teknologjive është më i madh në kompanitë e mëdha (83 për qind).