"Tinder Swindler" lansoi aplikacion – kërkohet nga Apple dhe Google ta bllokojnë

Shimon Hayut – më i njohur si "Tinder Swindler – mashtruesi nga Tinder" – dëshiron të lansojë një aplikacion takimesh pas publikimit të dokumentarit për mashtrimet që ka kryer.

Ideja e Hayut është të përdorë përvojën e tij me mashtrimet për të zhvilluar një platformë të quajtur "Safe Love" (Dashuri e Sigurt), e dizajnuar për të mbrojtur përdoruesit nga njerëz si ai.

Hayut pretendon se njohuritë e tij mbi metodat e gënjeshtrës, manipulimit dhe mashtrimit e vendosin atë në një pozicion unik për të krijuar një sistem që mund të parandalojë më mirë këtë sjellje. Megjithatë, ideja e tij ka shkaktuar tashmë reagime në industrinë e takimeve online.

Asociacioni Online Dating and Discovery Association (ODDA) dërgoi një letër tek Apple dhe Google, duke i kërkuar që të mos lejojnë që një aplikacion i lidhur me Hayut të shfaqet në dyqanet e tyre të aplikacioneve. Organizata thekson se përfshirja e tij në aplikacion do të përbënte një rrezik serioz për përdoruesit, veçanërisht për gratë.

Detajet se si "Safe Love" do të mbrojë në të vërtetë përdoruesit mbeten të panjohura. Hayut përmendi verifikimin e përdoruesve, moderimin dhe sistemet kundër mashtrimeve, por nuk shpjegoi se si do të funksiononin këto sisteme apo kur saktësisht aplikacioni do të bëhet i disponueshëm.

Në të njëjtën kohë, një aplikacion i këtij lloji ngre pyetje shtesë lidhur me besueshmërinë. Platformat moderne të takimeve përdorin gjithnjë e më shumë verifikimin e identitetit dhe mekanizma të tjerë sigurie, duke kërkuar nga përdoruesit të ndajnë të dhëna personale. Për një aplikacion të themeluar nga dikush i njohur për mashtrime romantike, besueshmëria në mënyrën se si ruhen këto të dhëna do të jetë veçanërisht e rëndësishme.

Aktualisht nuk dihet nëse Apple dhe Google do të pranojnë kërkesën e ODDA-s. "Safe Love" ende nuk është lansuar si një aplikacion i gjerë dhe shfaqja e mundshme në dyqanet e aplikacioneve do të varet nga përputhshmëria me politikat dhe kërkesat rregullatore të tyre.