Ambasada e Greqisë njofton koncertin e Maria Kostraki – Mosaico Mediterraneo
Ambasada e Greqisë në Shkup me kënaqësi njofton koncertin e ansamblit Maria Kostraki – Mosaico Mediterraneo, i cili do të mbahet në Filharmoninë e Republikës së Maqedonisë së Veriut, të shtunën, më 7 nëntor, me fillim në orën 20:00. Për shkak të interesit të madh nga publiku, koncerti do të jetë i hapur për të gjithë vizitorët dhe do të mbahet në Sallën e Madhe të Koncerteve të Filharmonisë së Republikës së Maqedonisë së Veriut.
Qindra mijëra vite Mediterani ka qenë një vend takimi i popujve, kulturave dhe traditave, secila prej të cilave ka kontribuar në krijimin e trashëgimisë së tij të pasur muzikore. Koncerti feston këtë shumëllojshmëri, duke bashkuar traditat muzikore nga e gjithë Mesdheu përmes një interpretimi bashkëkohor të trashëgimisë së përbashkët kulturore. Publiku do të ketë mundësinë të zbulojë emocionet dhe pasionet që lidhin kulturat e ndryshme gjatë shekujve dhe zhanreve muzikore, duke na kujtuar se muzika është e përjetshme dhe universale.
Një vend të veçantë në program ka muzika greke, përmes këngëve të Manos Hadjidakis, repertori muzikor i të cilit është në fokus të festimeve që organizon Ministria e Kulturës së Greqisë në vitin 2026. Programi i pasur muzikor plotësohet nga veprat e Charpentier, Monteverdi, Caccini, Serrano, Rossini, Satie, Rota, Karaindrou dhe Markopoulos, si dhe muzika tradicionale.
Mosaico Mediterraneo është një ansambël i përkushtuar muzikës mesdhetare në të gjitha format e saj, duke tejkaluar kufijtë gjeografikë dhe zhanret muzikore të zakonshme. Repertori i tij përfshin vepra nga mesjeta, rinisja, baroku dhe romantizmi, duke përfshirë gjithashtu traditat popullore të Evropës Jugore, tingujt dhe ritmet e Lindjes së Afërt dhe Afrikës, si dhe krijimtarinë bashkëkohore greke muzikore. Gjatë viteve të fundit, ansambli ka performuar në shumë qytete nëpër Evropë.
Maria Kostraki është soprano lirike greke me banim të përhershëm në Mynih. Përveç karrierës së suksesshme në fushën e muzikës klasike, ajo dallohet edhe me interpretimet e saj të muzikës greke, veçanërisht këngët e Manos Hadjidakis, me të cilat ka ndërtuar një shprehje artistike të njohur. Performancat e saj përfshijnë koncerte në Odeonin antik të Athinës, si dhe në sallat e koncerteve në Athinë dhe Selanik. Në skenën operistike ka performuar në "Boheme" me Orkestrën Simfonike Shtetërore të Selanikut dhe në produksionin e "Orfeut" të Operës Kombëtare Greke. Performancat e saj e kanë çuar edhe në prestigjiozin Carnegie Hall në Nju Jork.
Antonis Sousamoglou është koncert-majstor i Orkestrës Simfonike Shtetërore të Selanikut dhe violinist, kompozitor dhe aranxhues i shquar. Karriera e tij e pasur artistike përfshin performanca solistike në sallat e njohura të koncerteve, diskografi të rëndësishme si autor dhe aranxhues, si dhe bashkëpunime me të gjitha orkestrat kryesore greke.
