Një tjetër fëmijë i Angelina Jolie dhe Brad Pitt heq mbiemrin “Pitt”
Vivien, vajza 18-vjeçare e Angelina Jolie dhe Brad Pitt, zyrtarisht hoqi mbiemrin e babait të saj. Një gjykatës në Kaliforni miratoi kërkesën e saj të hënën, më 2 nëntor, duke e bërë atë fëmijën e katërt nga gjashtë fëmijët e çiftit të mëparshëm që ligjërisht ka ndryshuar mbiemrin e saj, raporton “People”.
Sipas dokumenteve gjyqësore, Vivien tani quhet Vivien Marcheline Jolie, në vend të Vivien Marcheline Jolie-Pitt. Ajo paraqiti kërkesën për ndryshimin e emrit në korrik, pak pasi mbushi 18 vjeç. Ajo tashmë përdorte mbiemrin Jolie; në maj 2024, në programin e produksionit të Broadway-t “Outsiders”, ku punoi së bashku me nënën e saj, ajo ishte e listuar si Vivien Jolie.
Para Vivien, të njëjtën gjë e bënë edhe motra e saj Zahara dhe vëllai Maddox. Ndryshimi i emrit të Zahara-s në “Zahara Marley Jolie” u konfirmua zyrtarisht më 28 shtator, ndërsa Maddox u bë “Maddox Chivan Jolie” më 14 shtator. Të dy paraqitën kërkesat e tyre gjatë verës. E para që nisi këtë proces ishte motra e tyre Shiloh, e cila paraqiti kërkesë për heqjen e mbiemrit të babait në ditëlindjen e saj të 18-të në vitin 2024.
Jolie (51) dhe Pitt (62), yjet e filmit “Zoti dhe Zonja Smith”, u ndanë në vitin 2016 pas 12 vjetësh bashkëjetesë, prej të cilave dy ishin të martuar. Divorci u finalizua zyrtarisht në dhjetor 2024.
Ata kanë gjashtë fëmijë: Maddox (25), Pax (22), Zahara (21), Shiloh (20) dhe binjakët Knox dhe Vivien (18).
Ndryshimet e mbiemrave ndodhin në kontekstin e një konflikti të gjatë mes ish-bashkëshortëve.
Në vitin 2016, u bë publike një informacion për një incident në një avion privat, i shoqëruar me akuza se Pitt ishte “fyerës me fjalë” dhe “agresiv fizikisht” ndaj njërit prej fëmijëve. FBI më vonë përfundoi verifikimin e rastit dhe vendosi të mos nisë hetim, ndërsa Departamenti i Shërbimeve për Fëmijë dhe Familje i Qarkut Los Anxhelos mbylli hetimin e vet pa gjetur prova për keqtrajtim.
