(Foto) Koreja e Veriut teston raketa të reja: pretendon se mund ta shndërrojë zonën në hi

Koreja e Veriut hodhi poshtë me forcë akuzat e FBI-së amerikane se qëndron pas vjedhjes së gjashtë miliardë dollarëve nga platforma e kriptovalutave Binance. Afërsisht në të njëjtën kohë, Pheniani kreu një lansim provë të raketave strategjike kroçeruese – që paraqet një demonstrim të ri të kapaciteteve ushtarake të vendit, raporton "Euronews".

Lansimi erdhi menjëherë pasi Kim Yo-jong, motra me ndikim e liderit verikorean Kim Jong-un, mohoi publikisht akuzat. Ajo i përshkroi pretendimet e FBI-së si "një provokim serioz politik". Të shtunën, FBI njoftoi se sulmi haker ishte kryer nga një grup i njohur si TraderTraitor, i lidhur me Korenë e Veriut. Sipas vlerësimeve të ekspertëve, kjo mund të jetë vjedhja më e madhe e kriptovalutave në histori.

Raketa e testuar me kokëluftuese të re
Në lansimin e së hënës u përdorën raketa strategjike kroçeruese të pajisura me një kokëluftuese të re kasetë, njoftoi të martën agjencia zyrtare koreane e lajmeve (KCNA). "Koka luftarake me shpërndarje të mesme e raketës kroçeruese është në gjendje të shndërrojë një sipërfaqe prej 5 deri në 6 hektarë në hi, falë fuqisë së saj shkatërruese me dendësi të lartë", thekson KCNA.

Agjencia theksoi se me këtë test është "përmirësuar aftësia për goditje vertikale ndaj objektivave, përmes përmirësimit të kapaciteteve manovruese të raketës në fazën përfundimtare të fluturimit". Një përfaqësues i Koresë së Veriut deklaroi se testi u krye sepse "forcat tona të armatosura duhet të mbrojnë sigurinë e vendit dhe të shmangin çdo lloj kërcënimi".