(Video) LSDM paraqet interpelancë për Stojllkoviq: Është koha për përgjegjësi politike për përhapjen e urrejtjes dhe lavdërimin e kriminelëve të luftës
LSDM paraqiti interpelancë për ish-zëvendëskryeministrin, tani ministër për vetëqeverisje lokale në qeverinë e Mickoskit – Ivan Stojllkoviq, deklaroi Mitko Trajçuleski, deputet nga LSDM.
„Është koha për përgjegjësi politike të njërit prej ekzekutivëve të Vuçiçit, të agjendave kineze dhe ruse, për përhapjen e urrejtjes dhe lavdërimin e kriminelëve të luftës. Bazat e interpelancës janë të qarta: sjellje e papranueshme dhe e papërshtatshme ndaj deputetëve me të cilën shkatërrohet dinjiteti i Kuvendit dhe veprim politik që është në kundërshtim me interesat kombëtare dhe strategjike të Maqedonisë. Stojllkoviq nuk i shërben qytetarëve të Maqedonisë, dhe për qëndrimin e tij në Qeveri është përgjegjës drejtpërdrejt Kristian Mickoski. Lidhja e tij me strukturat serbe të inteligjencës dhe paraqitjet e tij publike dhe aktivitetet e lidhura me Rusinë hapin një pyetje serioze: çfarë interesi përfaqëson si anëtar i Qeverisë maqedonase?“, pyeti Trajçuleski.
Sipas tij, promovimi i agjendave gjeopolitike të kundërta minon besimin te aleatët dhe dëmton interesat tona kombëtare.
„Hapim edhe çështjen e udhëtimit të tij në Kinë dhe paraqitjen me delegacionin e SNS dhe Vuçiçit. Interpelanca përfshin edhe përmbajtjet me të cilat lavdërohet Ratko Mlladiç, i dënuar për gjenocid“, tha Trajçuleski.
Siç tha, njerëzit që lavdërojnë kriminelët e dënuar të luftës dhe relativizojnë krimet e luftës nuk duhet dhe nuk kanë të drejtë të ushtrojnë funksione publike.
„Veçanërisht sepse në rastin konkret ekziston edhe vepër penale sipas Kodit Penal, që lidhet me miratimin ose justifikimin e gjenocidit, krimeve kundër njerëzimit ose krimeve të luftës. Ministri në një vend anëtar të NATO-s duhet të respektojë përcaktimet strategjike shtetërore. Nuk mund të përdorë funksionin për promovimin e politikave që i minojnë ato. Këtu lidhen edhe fyerjet, ofendimet dhe kërcënimet në Kuvend ndaj deputetëve të LSDM-së, ndaj Fatmir Bitit dhe ndaj meje personalisht, si dhe ndaj deputetes Arbana Paçoli“, tha Trajçuleski.
Ai shtoi se Stojllkoviq nuk është thirrur për përgjegjësi asnjëherë dhe nuk është kërkuar falje personalisht dhe për këtë arsye, siç tha, përgjegjësia politike duhet të përcaktohet para Kuvendit.
„Me këtë interpelancë kërkojmë përgjegjësi politike dhe një përgjigje të qartë nga shumica parlamentare: a do ta mbrojnë dinjitetin e Kuvendit dhe interesat shtetërore apo do ta mbrojnë Stojllkoviqin“, tha Trajçuleski.
