UGD Shtip për aksionin e MPB-së: Nuk do të lejojmë që asnjë dyshim të dëmtojë vlerën e diplomave të mijëra studentëve
Lidhur me veprimet policore të sotme dhe hetimin lidhur me dyshimet për keqpërdorim të sistemit elektronik të notave nga një punonjës i Universitetit, Rektorati i Universitetit "Goce Dellçev" – Shtip informon se UGD ofron bashkëpunim të plotë, të pakufizuar me MPB-në dhe prokurorinë kompetente për zgjidhjen e shpejtë dhe të plotë të rastit.
"UGD ka tolerancë zero ndaj korrupsionit dhe keqpërdorimit në komunitetin akademik dhe konsiderojmë se raste të tilla dhe të ngjashme synojnë të sigurojnë studime më të mira, më cilësore dhe më objektive. Dëshirojmë të sigurojmë komunitetin akademik, para së gjithash studentët tanë, stafin mësimor dhe administrativ, si dhe publikun më të gjerë, se UGD mbetet i përkushtuar ndaj vlerave themelore akademike, ndershmërisë dhe së vërtetës, dhe mbetet proaktiv në drejtim të luftës kundër dukurive devijante. Studentët tanë dhe arsimi i tyre mbeten në qendër të të gjitha aktiviteteve tona. Procesi mësimor, detyrat akademike, puna kërkimore-shkencore dhe bashkëpunimi ndërkombëtar me një sërë universitetesh të njohura evropiane vazhdojnë të jenë prioriteti ynë", thonë nga Universiteti.
Si institucion publik i arsimit të lartë, shtojnë ata, i sigurojmë publikun se mbetemi të përkushtuar ndaj transparencës, hapjes dhe integritetit institucional.
"UGD nuk do të lejojë që asnjë dyshim të dëmtojë punën dhe vlerën e diplomave të mijëra studentëve dhe punonjësve të ndershëm. UGD ka tolerancë zero ndaj çdo forme korrupsioni ose keqpërdorimi të pozitës zyrtare. Integriteti institucional dhe besimi i studentëve tanë janë mbi të gjitha", thonë nga Universiteti "Goce Dellçev" – Shtip.
Njoftimi vjen pas informacioneve se në UGD Shtip është në zhvillim një hetim për një punonjës të Universitetit për manipulime të dyshimta me notat. Punonjës policie po kryejnë bastisje në disa lokacione në Shtip dhe Shkup lidhur me kryerjen e veprave penale "keqpërdorim i pozitës dhe autorizimit zyrtar" dhe "dëmtim dhe hyrje e paautorizuar në sistem kompjuterik" nga drejtuesi i sektorit informatik në Universitetin e Shtipit.
