(Foto/Video) Një gimnaste 15-vjeçare u vra në një sulm raketor rus mbi qytetin ukrainas Çernihiv
Jana Pjeshkova, një gimnaste 15-vjeçare në gjimnastikën ritmike, vdiq dje në një sulm raketor rus mbi qendrën e qytetit ukrainas Çernihiv. Në të njëjtin sulm humbi jetën edhe bashkëmoshatarja dhe shoqja e saj e klasës, Maria Mozgova, gjithashtu 15 vjeçe.
Jana stërvitej prej vitesh në studion e gjimnastikës ritmike Magic Sports. Klubi i saj sportiv konfirmoi lajmin për vdekjen e saj, duke u ndarë me sportisten e re.
"Jana ishte pjesë e familjes sonë sportive. Para saj ishte e gjithë jeta, plot ëndrra dhe plane. Në zemrat tona, ajo do të mbetet gjithmonë e gëzuar, e sinqertë dhe me buzëqeshje. Është e pamundur të pranohet që ajo nuk është më me ne. Nuk ka fjalë që mund të lehtësojnë këtë dhimbje", thanë nga klubi Magic Sports, duke shprehur ngushëllime familjes së saj.
Sulm në mes të ditës në një qendër të mbushur me njerëz
Forcat ruse kryen një sulm raketor mbi qendrën e Çernihivit gjatë ditës, në kohën kur rrugët ishin plot me kalimtarë. Sipas informacionit të dhënë nga Dmitro Brizhinski, shefi i Administratës Ushtarake të Qytetit të Çernihivit, në sulm u plagosën edhe 15 persona të tjerë, përfshirë tre fëmijë.
Njëmbëdhjetë nga të plagosurit u dërguan në spitale, ndërsa katër të tjerëve iu dha ndihma mjekësore në vendngjarje.
Nga fuqia e shpërthimeve u përfshirë zjarri një dyqan dhe dy makina, ndërsa u dëmtuan rëndë edhe ndërtesat banesore përreth, ambientet e biznesit dhe automjetet e parkuara. Shërbimet e shpëtimit dhe zjarrfikësit punuan për orë të tëra për pastrimin e rrënojave në qendër të qytetit.
