(Foto+video) Sulm masiv ukrainas me dronë ndaj Belgorodit: tre persona vdiqën, 13 u plagosën

Një sulm masiv me dronë ukrainas goditi rajonin kufitar rus të Belgorodit gjatë natës, ku humbën jetën tre persona dhe 13 u plagosën, njoftuan autoritetet lokale.

Sipas raporteve lokale dhe videove të publikuara në rrjetet sociale, një pjesë e madhe e dronëve ishin drejtuar drejt zonës qendrore të Belgorodit. Si objektiv i mundshëm i sulmit përmendet kompleksi tregtar-argëtues "MegaGRINN", më i madhi i këtij lloji në qytet.

Kompleksi shtrihet në më shumë se 163,000 metra katrorë dhe përfshin mbi 200 dyqane, një supermarket, kinema dhe restorante. Sipas informacioneve të publikuara, në momentin e sulmit ishte i mbyllur dhe nuk kishte vizitorë. Banorët lokalë raportuan edhe një zjarr në oborrin e një kompleksi banesor në të njëjtën zonë.

Shtabi operativ i rajonit të Belgorodit konfirmoi "sulm masiv me pajisje fluturuese pa pilot" dhe njoftoi se shërbimet emergjente janë dërguar në vendet e goditura, pa specifikuar se cilat objekte ishin objektiv.

Guvernatori i rajonit, Aleksandër Shuvaev, deklaroi se në sulmin në Belgorod kanë vdekur dy persona dhe 13 janë plagosur. Sipas tij, janë dëmtuar 30 ndërtesa banimi, 35 automjete, katër shtëpi, tre ndërtesa administrative, tetë ambiente biznesi dhe tre objekte me interes publik. Një person tjetër ka vdekur në një fshat pranë qytetit Shebekino.

Në videot e publikuara në rrjetet sociale shihen shpërthime, zjarre dhe veprime të mbrojtjes ajrore ruse mbi Belgorod. Autoritetet lokale u bënë thirrje banorëve të qëndrojnë në ambiente të mbyllura pasi sulmet në rajon vazhduan.

Belgorodi ndodhet rreth 34 kilometra nga kufiri ukrainas dhe rreth 70 kilometra nga Kharkivi. Për shkak të afërsisë me frontin, qyteti shpesh është objekt i sulmeve ukrainase. Në sulmet e mëparshme janë goditur infrastruktura energjetike dhe objekte logjistike.

Sulmi ndodhi pasi Ukraina njoftoi se sistemi "Starshield", versioni ushtarak i sistemit satelitor të internetit "Starlink", po funksionon përsëri me kapacitet të plotë. Sipas raporteve, sistemi nga 14 tetori funksiononte me shpejtësi të reduktuar ndjeshëm, gjë që e vështirësoi disa operacione ushtarake të forcave ukrainase.