(Foto+video) Ukraina sulmoi Rusinë me mbi 1.000 dronë, zjarr në terminalin e naftës në Shën Petersburg, ka të vrarë dhe të plagosur

Sulmet ukrainase me dronë shkaktuan zjarr në një terminal për eksportin e naftës në Shën Petersburg, ndërsa Kievi njëkohësisht lëshoi më shumë se 1.000 dronë drejt pjesëve të ndryshme të Rusisë, në një nga sulmet më masive ajrore që nga fillimi i luftës. Sulmet ndodhin në kushte të tensioneve të rritura midis Ukrainës dhe Uashingtonit, pasi presidenti amerikan Donald Trump kritikoi Kievin për sulmet ndaj infrastrukturës ruse të naftës, raportoi "New York Post".

Guvernatori i Shën Petersburgut, Aleksandër Beglov, njoftoi se në sulme ka vdekur një person, ndërsa pesë të tjerë janë plagosur. Zjarr ka shpërthyer në terminalin e naftës dhe në depozitën komunale të naftës "Ruchi".

Në mesin e objektivave të sulmeve ishin edhe një qendër logjistike e kompanisë tregtare ruse "Ozon" dhe një qendër të dhënash e kompanisë teknologjike VK. Të dy kompanitë konfirmuan informacionin se objektet e tyre u goditën.

Ministria ruse e Mbrojtjes njoftoi se forcat e saj shkatërruan 1.015 dronë ukrainas mbi 15 rajone ruse, si dhe mbi gadishullin e aneksuar Krim dhe Detin e Zi.

Zëdhënësi i Kremlinit, Dmitri Peskov, për agjencinë shtetërore ruse TASS deklaroi se Kievi i “kundërvihet” pushtimit rus, por se Ukraina nuk mund të “ndryshojë rrjedhën aktuale të ngjarjeve”.

Viktima edhe në Ukrainë pas sulmeve ruse

Ndërkohë, në dy sulme ruse ndaj qytetit Zaporizhzhia në jug të Ukrainës, një grua ka vdekur dhe të paktën dy persona janë plagosur, përfshirë një vajzë gjashtëvjeçare, njoftuan autoritetet lokale.

Kreu i administratës ushtarake rajonale të Zaporizhzhias, Mihailo Semikin, deklaroi se janë dëmtuar dy ndërtesa banimi, 18 automjete dhe një institucion arsimor.

Presidenti amerikan Donald Trump më 11 tetor njoftoi se Rusia dhe Ukraina ranë dakord për një “armëpushim energjetik” në luftën që zgjat katër e gjysmë vjet. Ai nuk bëri publike detajet e marrëveshjes, ndërsa Kievi pas deklaratës së tij raportoi sulme të reja ruse ndaj objekteve energjetike.

Ukraina tre ditë më parë konfirmoi se ka rifilluar sulmet ndaj infrastrukturës ruse të naftës pas një pushimi tre ditor. Qeveria ukrainase më parë pretendonte se po respekton armëpushimin.

Presidenti ukrainas Volodymyr Zelenski shprehu indinjatë për vazhdimin e bombardimeve ruse ndaj infrastrukturës energjetike, duke akuzuar Moskën se me këtë injoron kërkesën e Trump që të dyja palët të ndalojnë këto sulme.

Sot Zelenski në platformën X publikoi se Rusia ka kryer 76 sulme ndaj sektorit energjetik, naftës dhe gazit ukrainas gjatë një jave nga njoftimi i marrëveshjes për armëpushim energjetik.

Ai tha se vetëm gjatë natës së kaluar u sulmuan nënstacionet në rajonet Vinica, Zhytomir, Hmelnitski dhe Odesa, për shkak të të cilave dhjetëra mijëra familje mbetën pa energji elektrike. Punonjësit e energjisë dhe ekipet e riparimit punojnë pothuajse 24 orë në ditë për të rikthyer furnizimin me energji.

Sipas Zelenskisë, gjatë natës forcat ruse sulmuan edhe objekte banimi në rajonet ukrainase, ku sipas të dhënave të tij u plagosën 12 persona, përfshirë dy fëmijë, dhe dy persona vdiqën. Ai njoftoi gjithashtu se në mëngjes u godit një fermë bujqësore në rajonin Volin.

"Në total, gjatë javës së kaluar, rusët sulmuan Ukrainën me pothuajse 2,700 dronë luftarakë, 1,700 bomba ajrore dhe 66 raketa, shumica prej tyre balistike. Objektivat kryesore të këtyre sulmeve janë objektet energjetike – rusët përpiqen të shkaktojnë një ndërprerje të plotë të furnizimit me energji elektrike", shkroi Zelenski.

Ai vlerësoi se SHBA duhet të vërejë se Rusia nuk po merr hapa të përshtatshëm si përgjigje ndaj lehtësimit të sanksioneve ose marrëveshjeve të arritura.

"Përkundrazi, çdo sinjal për mundësi fitimi e interpretojnë si provë se basti i tyre në luftë po shpërblehet dhe se mund të vazhdojnë të luftojnë", tha presidenti ukrainas.

Zelenski theksoi se sipas tij, lufta vazhdon për shkak të pushtimit rus, jo për shkak të mbrojtjes ukrainase.

"Rusia është ajo që duhet të përballet me presion për të pasur një shans për paqe. Faleminderit të gjithëve që e kuptojnë këtë dhe ndihmojnë", shkroi ai.

Trump ende nuk zbulon vendimin për sanksionet ndaj Rusisë

Presidenti amerikan Donald Trump dje deklaroi para gazetarëve se ende nuk është e qartë se çfarë vendimi do të marrë lidhur me sanksionet e mëtejshme ndaj Rusisë, megjithëse mbrëmë kishte nënshkruar një urdhër ekzekutiv që heq kufizimet e planifikuara.

Si arsye për vendimin ai përmendi interesin kombëtar të SHBA-së.

"Do ta vendosim gjithçka, do ta mësoni. Por kjo është një vendim shumë i mirë, një vendim që do të jetë i mirë për vendin, dhe besoj edhe për gjithë botën", tha Trump në një darkë bamirësie në pronën e tij në Florida.

Ngjarjet zhvillohen në kushte të sulmeve të vazhdueshme ruse dhe ukrainase ndaj infrastrukturës energjetike, ndërsa Uashingtoni përpiqet të ndërmjetësojë ndalimin e sulmeve dhe të hapë hapësirë për uljen e intensitetit të luftës.