Guvernatori Slaveski në takim me përfaqësues të lartë nga Banka Botërore: mbështetje për modernizimin e sistemeve të pagesave dhe integrimin në infrastrukturën evropiane të pagesave

Banka Botërore mbështet aktivisht aktivitetet e Bankës Popullore për integrimin e sistemit financiar vendas në infrastrukturën evropiane të pagesave, me theks të veçantë në krijimin e një sistemi kombëtar për pagesa instant, lidhjen rajonale me sistemet e pagesave të vendeve të Ballkanit Perëndimor dhe integrimin me TIPS – sistemin për përllogaritjen e pagesave instant të Bankës Qendrore Evropiane.

Kjo u theksua në takimet e guvernatorit Trajko Slaveski me zv/presidenten e Bankës Botërore, Antonela Basani, dhe me drejtorin ekzekutiv të Bankës Botërore për Konstituencën ku bën pjesë vendi ynë, Yudzhin Rugenat. Takimet u mbajtën në kuadër të Takimeve Vjetore të Fondit Monetar Ndërkombëtar (FMN) dhe Grupit të Bankës Botërore (BB), ku u shqyrtuan aktivitetet aktuale dhe hapat e ardhshëm për modernizimin e sistemeve të pagesave, dixhitalizimin e pagesave dhe për harmonizimin e mëtejshëm të rregulloreve kombëtare me kuadrin ligjor evropian.

Gjatë takimeve, Slaveski theksoi se një vit pas anëtarësimit të vendit tonë në Zonën Unike të Pagesave në euro – SEPA, kjo iniciativë është shndërruar në një kanal kryesor për kryerjen dhe marrjen e pagesave ndërkufitare në euro, duke sjellë përfitime konkrete dhe të dukshme për qytetarët dhe komunitetin e biznesit, por edhe për ekonominë në tërësi.

Në këtë periudhë, prioritet i Bankës Popullore është krijimi i një platforme kombëtare për pagesa instant, e bazuar në modelin e sistemit evropian TIPS, që do të përbëjë një hap të rëndësishëm për modernizimin e infrastrukturës vendase të pagesave. Pas futjes së pagesave instant në tregun vendas, hapi tjetër do të jetë lidhja rajonale me sistemet e pagesave të vendeve të rajonit dhe integrimi i tyre në hapësirën më të gjerë evropiane të pagesave. Në këtë mënyrë do të krijohen kushtet për kryerjen instant edhe të pagesave ndërkufitare, që do të kontribuojë në thellimin e lidhjeve ekonomike me tregun rajonal dhe evropian, rritjen e efikasitetit të pagesave dhe mbështetjen e rritjes ekonomike.

Në takimet me përfaqësuesit e lartë të Bankës Botërore u konfirmua edhe rëndësia e partneritetit afatgjatë në zbatimin e disa projekteve për të cilat Banka Botërore siguron mbështetje teknike për Bankën Popullore. Bashkëpunimi i vazhdueshëm kontribuon në forcimin e mekanizmave për ruajtjen e stabilitetit financiar, përmirësimin e kuadrit rregullator dhe mbikëqyrës, zhvillimin dhe zbatimin e politikave makroprudenciale, modernizimin e sistemeve të pagesave dhe përmirësimin e menaxhimit të rreziqeve.

Vazhdimi i këtij partneriteti përbën një mbështetje të rëndësishme për zhvillimin e mëtejshëm të sistemit financiar në vendin tonë, rritjen e qëndrueshmërisë së tij dhe lidhjen më efikase me infrastrukturën financiare evropiane dhe rajonale, njoftuan nga NRBM.