Gjermania shqyrton ditën e punës prej 12 orësh dhe gjysmimin e kuotës për punëtorët nga Ballkani Perëndimor

Gjermania po shqyrton ndryshime në tregun e punës që mund të ndikojnë edhe tek punëtorët nga Ballkani Perëndimor. Ndër masat e propozuara është futja e mundësisë për ditë pune prej 12 orësh në raste të caktuara, ulja e kuotës vjetore për punëtorët nga rajoni dhe rregulla më të rrepta për provimet e gjuhës gjermane.

Për ndryshimet e mundshme për “N1” ka folur gazetari i “Deutsche Welle”, Mehmed Smajić, duke theksuar se Gjermania njëkohësisht përballet me mungesë prej rreth 148.000 punëtorëve të kualifikuar të nevojshëm për realizimin e projekteve të mëdha infrastrukturore.

Ndërrime të mundshme prej 12 orësh

Qeveria gjermane po shqyrton ndryshime në Ligjin për orarin e punës me të cilat do të mundësohej që të punësuarit në raste të caktuara të punojnë edhe deri në 12 orë në ditë.

Sipas rregullave aktuale, orari i punës zakonisht është i kufizuar në tetë orë në ditë, me mundësi zgjatjeje deri në dhjetë orë, me kusht që orët shtesë të kompensohen me orar më të shkurtër në periudha të tjera.

Me modelin e propozuar, orari i punës do të llogaritej në nivel javor. Kjo do të thotë se të punësuarit në disa ditë mund të punojnë më gjatë, ndërsa në ditë të tjera më pak ose të kenë më shumë ditë pushimi.

Punëdhënësit mbështesin fleksibilitet më të madh, ndërsa sindikatat paralajmërojnë për pasojat e mundshme në shëndetin e punëtorëve dhe jetën familjare. Ndërrimet më të gjata nuk do të nënkuptonin automatikisht pagë më të lartë.

Kuota për punëtorët nga Ballkani Perëndimor ulet për gjysmë

Një nga ndryshimet më të rëndësishme të paralajmëruara lidhet me Rregullin për Ballkanin Perëndimor, përmes të cilit qytetarët nga rajoni mund të marrin vizë pune gjermane me procedurë të thjeshtuar.

Sipas paralajmërimeve, nga janari i vitit 2027 kuota vjetore do të ulet nga 50.000 në 25.000 punëtorë. Masa do të përfshijë edhe shtetasit e Serbisë.

Të dhënat e Agjencisë Federale Gjermane për Punësim tregojnë se në shtator në Gjermani ishin të punësuar rreth 546.000 persona nga Ballkani Perëndimor. Nga ata, 53 për qind punonin në vende pune për të cilat kërkohen të paktën kualifikime të punëtorit të specializuar.

Agjencia për punësim është kundër uljes së kuotës, duke paralajmëruar se kjo mund të vështirësojë më tej sigurimin e fuqisë punëtore, veçanërisht në ndërtimtari, transport, logjistikë dhe hotelieri.

Gjermania ka ndarë 500 miliardë euro për projekte infrastrukturore, por sipas të dhënave të Institutit për Ekonominë Gjermane, i mungojnë rreth 148.000 punëtorë të kualifikuar. Veçanërisht kërkohen elektrikantë, mekanikë dhe instalatorë për ngrohje dhe klimatizim.

Rregulla më të rrepta për provimet e gjuhës gjermane

Ndryshime paralajmërohen edhe për provimin DTZ, i cili përdoret për të dëshmuar njohjen e gjuhës gjermane, përfshirë edhe nivelin B1.

Sipas informacioneve të publikuara, nga 1 nëntori duhet të hyjnë në fuqi rregulla më të rrepta, sipas të cilave kandidatët nuk do të mund të anashkalojnë më plotësisht pjesën me shkrim të provimit dhe megjithatë të marrin certifikatë për nivelin B1.

Kjo nivel njohjeje gjuhësore është e rëndësishme për realizimin e disa të drejtave lidhur me qëndrimin dhe për marrjen e shtetësisë gjermane.

Ndryshimet kryesisht do të prekin kandidatët që do të japin provimin në të ardhmen. Ata që tashmë posedojnë certifikatën përkatëse nuk do të duhet automatikisht ta japin përsëri provimin.