Koalicioni saudit kap raketa dhe dronë të Houthive
Koalicioni i udhëhequr nga Arabia Saudite njoftoi sot se ka kapur dhe shkatërruar raketa balistike dhe mjete fluturuese pa pilot të nisura nga Houthit drejt dy rajoneve në Arabinë Saudite, në një kohë kur konflikti midis Mbretërisë dhe grupit të lidhur me Iranin po intensifikohet.
Houthit kanë nisur tre raketa balistike drejt Provincës Lindore të Arabisë Saudite dhe katër mjete fluturuese pa pilot drejt rajonit jugor, njoftoi koalicioni.
Mbrojtja civile saudite më parë kishte lëshuar një paralajmërim për një kërcënim të mundshëm armiqësor në Provincën Lindore dhe në provincën Kharj, dhe më vonë njoftoi se rreziku në të dyja zonat ka kaluar.
Eskalimi hapi një front të ri në konfliktin e SHBA-së dhe Izraelit kundër Iranit.
Arabia Saudite ka intensifikuar sulmet ndaj Houthive pasi ky grup muajin e kaluar mori zona strategjike përgjatë bregut jemenas të Detit të Kuq dhe po përparonte drejt ngushticës Bab el-Mandeb – një rrugë detare jetike globale për eksportin e naftës nga vendet e Gjirit Persik.
Kjo ngushticë ndodhet në anën tjetër të Gadishullit Arab në krahasim me ngushticën e Hormuzit. Luftimet e rinovuara midis dy palëve ndërprenë armëpushimin e vitit 2022, të arritur me ndërmjetësimin e Kombeve të Bashkuara, i cili në masë të madhe ndaloi armiqësitë midis koalicionit të udhëhequr nga Arabia Saudite – që mbështet qeverinë e njohur ndërkombëtarisht të Jemenit – dhe Houthive, të cilët kontrollojnë kryeqytetin Sana. Eskalimi gjithashtu hapi një front të ri në luftën e SHBA-së dhe Izraelit kundër Iranit, vuri në dukje Reuters.
