Merç bëri thirrje për unitet në koalicionin qeverisës dhe paralajmëroi për përpjekjet ruse për destabilizim
Kancelari gjerman Friedrich Merç bëri thirrje për unitet në koalicionin qeverisës, duke paralajmëruar se Gjermania përballet me kërcënime gjithnjë e më të mëdha nga ekstremizmi politik dhe, siç tha ai, me përpjekje të përditshme të Rusisë për destabilizimin e vendit.
Duke folur në konferencën e Bashkimit Kristian-Social (CSU), partia motër e Bashkimit Kristian-Demokrat (CDU) në Bavari, Merç vlerësoi se Gjermania përballet me "sfida jashtëzakonisht serioze", transmetoi Reuters.
"Si t'i mbrojmë lirinë dhe sigurinë në Evropë përballë kërcënimeve gjithnjë e më të mëdha nga ekstremistët në vend dhe nga forcat e huaja jashtë?", pyeti Merç, duke pretenduar se Rusia përpiqet "çdo ditë të destabilizojë Gjermaninë".
Kancelari, i cili në konferencë mbërriti në shoqërim të një orkestre frymore bavareze që interpretonte këngën "Eye of the Tiger", lavdëroi ministrat nga radhët e CSU-së në qeverinë federale dhe i dha mirënjohje liderit të partisë, Markus Zeder.
Merç hodhi poshtë mundësinë e bashkëpunimit me AfD-në
Merç përsëri u kundërvu propozimeve të disa konservatorëve për të shqyrtuar mundësinë e bashkëpunimit me Alternativën për Gjermaninë (AfD), e cila, sipas sondazheve të përmendura, ka mbështetjen më të madhe në nivel kombëtar.
"Çdo politikan që voton së bashku me atë parti nuk ka vend në Unionin tonë", theksoi Merç, duke iu referuar bllokut konservator CDU–CSU.
Delegatët në konferencë përshëndetën me duartrokitje të forta përmendjen e Ilze Ajgnerit, politikane e CSU-së që partia e propozoi si pasuese e presidentit gjerman Frank-Valter Shtajnmajer, mandati i të cilit skadon vitin e ardhshëm.
CDU deri tani nuk e ka mbështetur kandidaturën e Ajgnerit, dhe burime partiake thonë se nuk përjashtohet mundësia që konservatorët të propozojnë kandidatin e tyre për funksionin presidencial, i cili kryesisht ka karakter ceremonial.
Kontest edhe për Lëvizjen e Majtë
Merç u bëri thirrje edhe Partisë Socialdemokrate të Gjermanisë (SPD) dhe të Gjelbërve që të mos formojnë koalicion me partinë Lëvizja e Majtë në Berlin. Ai akuzoi Lëvizjen e Majtë se toleron antisemitizmin në radhët e saj, çka partia e mohoi.
Deklaratat e kancelarit gjerman vijnë pas disa javësh tensioni në koalicionin qeverisës, të shtuar më tej nga humbjet zgjedhore në zgjedhjet rajonale në Gjermaninë lindore.
Sipas Reuters, AfD-ja e djathtë ka fituar vendin e parë në dy lande federale, ndërsa Lëvizja e Majtë ka fituar në Berlin.
Mbështetja për Merçin ka rënë në nivel rekord të ulët, dhe mosmarrëveshjet vazhdojnë si mes partnerëve të koalicionit ashtu edhe brenda bllokut konservator CDU–CSU.
