Kryeministri britanik i bëri thirrje qytetarëve të bëjnë rezervë ushqimi dhe uji

Kryeministri britanik Andy Burnham u këshilloi qytetarëve të bëjnë rezervë me ushqim të konservuar dhe ujë të shishezuar për t'u përgatitur për situata emergjente. Në kohën kur stuhi të forta godasin Mbretërinë e Bashkuar, dhe së fundmi pati ndërprerje të lidhjeve të internetit të shkaktuara nga një dobësi e madhe sigurie, Burnham deklaroi se duket se ngjarjet e papritura po bëhen gjithnjë e më të shpeshta, shkruan BBC.

Qeveria britanike ka përgatitur rekomandime sipas të cilave familjet duhet të kenë rezervë uji dhe ushqimi të konservuar të mjaftueshëm për tre ditë. Qëllimi është që qytetarët të përballojnë më lehtë situata krize, si lufta, sulmet kibernetike ose katastrofat natyrore.

"Nuk bëhet fjalë për blerje paniku. Bëhet fjalë për masa të arsyeshme, që të keni ushqime të mjaftueshme në shtëpi dhe të mund të përballoni një situatë të vështirë nëse ajo ndodh", deklaroi Burnham.

Muajin e kaluar Zyra Kombëtare e Auditimit (NAO) paralajmëroi se zinxhiri i furnizimit me ushqim është i rrezikuar për shkak të rritjes së kërcënimit nga sulmet kibernetike dhe krizës klimatike.

Raporti thekson se Ministria e Mjedisit, Ushqimit dhe Çështjeve Rurale (Defra) në vitet e fundit nuk ka bërë mjaftueshëm për të forcuar rezistencën e sistemit të furnizimit me ushqim.

Drejtori ekzekutiv i Federatës së zinxhirit të ftohtë, që bashkon kompani për transportin e ushqimit në kushte të kontrolluara temperaturash, gjithashtu deklaroi se janë objektiv i hakerave rusë që njohin dobësitë në sistemin e furnizimit me ushqim.

Burnham, në samitin për rezistencën në Liverpool, hodhi poshtë pretendimet se qeveria nuk është përgatitur mjaftueshëm mirë.

"Jo, ne thjesht po flasim me njerëzit për mënyrën se si të jenë më të përgatitur, sepse jetojmë në një botë ku ngjarjet e papritura po bëhen gjithnjë e më të shpeshta. Është e qartë që po përballemi me mot të keq. Sot Mbretëria e Bashkuar është goditur nga stuhi dhe ne ndjejmë keqardhje për njerëzit në Cornwall që aktualisht janë pa energji elektrike", tha ai.

"Është e rëndësishme të keni ato rezervë në shtëpi që të mund të përballoni këto momente. Pra, ne po fillojmë një bisedë për rezistencën", shpjegoi kryeministri britanik.

Qeveria britanike rekomandon që qytetarët të kenë rezervë prej nëntë litrash ujë për person, që është e mjaftueshme për tre ditë, si dhe ushqim me afat të gjatë përdorimi, përfshirë mish të konservuar, perime dhe fruta të thata.

Autoritetet këshillojnë gjithashtu që familjet të kenë një radio FM me bateri ose me furnizim manual.

Në rast krize kombëtare, BBC do t'u japë përparësi lajmeve dhe informacionit lidhur me shëndetin dhe sigurinë. Radio FM do të ishte një nga mënyrat më të mira për të marrë informacion në rast ndërprerjeje serioze të energjisë elektrike.

Në listën e rezervave të rekomanduara janë edhe mjete për dezinfektimin e duarve, peceta të lagura, produkte për higjienën personale, ushqim për kafshët shtëpiake dhe produkte për foshnjat.

Gjithashtu rekomandohen një dritë baterie, batanije, bateri portative e mbushur për telefonin celular, para në dorë në rast ndërprerjeje të sistemeve elektronike të pagesave, pajisje për ndihmën e parë dhe kopje të dokumenteve të rëndësishme.

Autoritetet britanike theksojnë se qëllimi nuk është që qytetarët të blejnë panikisht produkte, por të sigurojnë gradualisht rezervat bazë që do t'u mundësojnë të funksionojnë vetë në 72 orët e para të një krize të mundshme.