(Video) Rrëzohet ndërtesë me shumë kate në Kenia, kërkohet për persona të mbetur nën rrënoja
Një ndërtesë me shumë kate në ndërtim u rrëzua sot në Nairobi, kryeqyteti i Kenias, ku frikësohet se një numër i madh njerëzish kanë mbetur të mbuluar nën rrënoja, transmeton agjencia AP.
Ndërtesa u shemb rreth orës 13 në rrugën e ngarkuar tregtare në lagjen Eastleigh. Mbi dhjetë kate u rrëzuan njëri mbi tjetrin, duke lënë sasi të mëdha rrënojash betoni.
Sipas shefit të policisë në Nairobi, Isa Mohamud, të paktën një grua e plagosur është nxjerrë dhe dërguar në spital, ndërsa ekipet e shpëtimit vazhdojnë kërkimin për të mbijetuar. Numri i personave të mbuluar ende nuk dihet.
Një nga punëtorët, Joseph Kaula, i cili arriti të shpëtojë pak para shembjes, rrëfeu se dëgjoi britma dhe pa kolegët e tij të vrapojnë drejt daljeve.
"Unë isha i fundit që dola para se gjithçka të shembej. E gjithë zona u mbulua me pluhur", tha ai.
Operacioni i shpëtimit fillimisht u vështirësua për shkak të mungesës së makinerive të rënda, ndërsa policia përdori gaz lotsjellës për të shpërndarë persona që filluan të grabisnin dyqane përreth.
Guvernatori i Nairobi-t, Johnson Sakaja, konfirmoi se ndërtesa kishte leje ndërtimi, por jo leje përdorimi, megjithëse disa dyqane tashmë punonin në katin përdhes.
Autoritetet njoftuan një hetim për shkaqet e shembjes dhe përcaktimin e përgjegjësisë së mundshme.
