Kremlini: Rusia dhe Ukraina po harmonizojnë afatet për armëpushim
Zëdhënësi i Kremlinit, Dmitrij Peskov, deklaroi sot se forcat ushtarake ruse dhe ukrainase po harmonizojnë afatet për armëpushim në zonën e qytetit Oleshki, në rajonin e Khersonit, transmeton RIA Novosti.
"Njerëzit që dëshirojnë do të mund të largohen nga ajo vendndodhje", tha Peskov.
Ai theksoi se Rusia përshëndet përpjekjet e zonjës së parë të SHBA-së, Melania Trump, e cila sipas tij ka dhënë një kontribut të rëndësishëm në operacionin humanitar në Oleshki.
Peskov shtoi se një kontribut të madh kanë dhënë edhe avokatja ruse për të drejtat e njeriut, Jana Lantratova, dhe kolegu i saj ukrainas Dmitro Lubinets.
Në të njëjtën kohë, zëdhënësi i Kremlinit deklaroi se bashkëpunimi ushtarak midis Uashingtonit dhe Kievit nuk është ndërprerë.
"Nuk duhet ta shikojmë këtë me sy rozë. Por kjo nuk e pengon harmonizimin e misioneve kaq të rëndësishme humanitare, arritjen e marrëveshjeve dhe koordinimin e shumë detajeve komplekse", tha Peskov.
Marrëveshja duhet të hyjë në fuqi më 29 tetor
Shtëpia e Bardhë njoftoi më parë sot se Shtetet e Bashkuara të Amerikës kanë ndërmjetësuar arritjen e një marrëveshjeje për armëpushim në Oleshki, e cila duhet të hyjë në fuqi më 29 tetor.
Bëhet fjalë për një armëpushim lokal dhe të përkohshëm, me qëllim lehtësimin e dhënies së ndihmës humanitare dhe evakuimin e civilëve.
Oleshki ndodhet në bregun e majtë të lumit Dnieper, përballë qytetit Kherson, i cili është nën kontrollin e forcave ukrainase.
Guvernatori i rajonit të Khersonit, Vladimir Saldo, deklaroi më parë se forcat ukrainase vendosin mina nga distanca në rrugë dhe sulmojnë me dronë automjetet, me qëllim pengimin e furnizimit me ushqim, karburant dhe ilaçe.
Sipas pretendimeve të tij, forcat ukrainase sulmojnë edhe objektet e infrastrukturës energjetike dhe komunikacionit, me qëllim krijimin e një situate të rëndë humanitare.
Peskov deklaroi më parë se ushtria ruse po bën gjithçka për të zgjidhur problemin e furnizimit me ushqim dhe ilaçe. Ai e vlerësoi situatën në qytet si kritike, duke pretenduar se autoritetet ukrainase me çdo mjet përpiqen të pengojnë furnizimin.
