Paralajmërim për cunami në Itali: seri tërmetesh shkaktoi panik, evakuim i shkollave dhe institucioneve publike

Në pjesën jugore të Detit Tirren sot është regjistruar një seri tërmetesh, ku më i forti kishte magnitudë 5 shkallë sipas shkallës Rihter. Pas tërmeteve është lëshuar paralajmërim portokalli për rrezik nga cunami, ndërsa në Palermo janë evakuuar shkolla dhe zyra.

Sipas të dhënave të Institutit Kombëtar Italian për Gjeofizikë dhe Vullkanologji (INGV), tre tërmetet më të forta, me magnituda 5, 3.6 dhe 4.3 shkallë, janë regjistruar brenda disa minutash.

Që nga ora 11, në këtë zonë janë regjistruar gjithsej 25 ngjarje sizmike, transmeton agjencia "Adnkronos".

Tërmetet janë ndjerë fuqishëm në Palermo dhe në vendbanimet bregdetare, deri në Mesina, sipas postimeve të përdoruesve në rrjetet sociale.

Qytetarët kanë raportuar se dridhja e tokës ishte e fortë dhe zgjati gjatë.

Një numër i madh banorësh dolën në rrugë edhe në Trapani, ku tërmeti gjithashtu u ndje qartë.

Si masë paraprake është evakuuar edhe ndërtesa e gjykatës.

Pas serisë së tërmeteve, autoritetet kanë lëshuar paralajmërim portokalli për rrezik nga cunami.

Kreu i Mbrojtjes Civile të Siçilisë, Salvo Cocina, ka urdhëruar ngritjen urgjente të nivelit të gatishmërisë dhe gatishmëri të plotë operative të shërbimeve kompetente dhe komunave në zonat e rrezikuara.

Banorëve në zonat bregdetare u është bërë thirrje të ndjekin udhëzimet dhe rekomandimet zyrtare të shërbimeve kompetente.

Mësimi në Universitetin e Palermos është ndërprerë.