(Video) Zjarr i madh pyjor në Kaliforni, urdhërohet evakuimi i rreth 4.600 personave
Janë dhënë urdhëra për evakuim për pjesë të qarkut Orange në shtetin amerikan të Kalifornisë, ku po përhapet shpejt zjarri pyjor "Norte". Të paktën gjashtë shtëpi janë dëmtuar ose shkatërruar, dhe në fikjen e zjarrit po marrin pjesë qindra zjarrfikës, njoftuan autoritetet lokale.
Sipas të dhënave të shërbimit të zjarrfikësve, evakuimi përfshin rreth 4.600 persona, ndërsa afërsisht 16.000 banorë ndodhen në zonën e rrezikuar.
Zjarri shpërtheu të premten pasdite me orën lokale në San Clemente dhe deri tani ka përfshirë të paktën 465 hektarë.
Dy zjarrfikës janë plagosur
Nuk ka banorë të plagosur në zjarr, por dy zjarrfikës janë lënduar, njoftuan autoritetet përkatëse.
Skuadrat po e fiknin zjarrin nga toka dhe nga ajri, ndërsa qytetarët janë thirrur të shmangin zonat e rrezikuara.
Kreu i shërbimit të zjarrfikësve të qarkut Orange, T.J. McGovern, deklaroi se kushtet e motit dhe konfigurimi i terrenit kanë kontribuar në përhapjen e shpejtë të zjarrit.
Si masë paraprake, janë mbyllur disa shkolla brenda distriktit të bashkuar shkollor Capistrano.
Era të forta rrisin rrezikun nga zjarret
Zjarri shpërtheu në një periudhë me kushte të pafavorshme për fikjen e zjarreve pyjore, duke përfshirë erërat e forta Santa Ana dhe temperaturat e larta.
Paralajmërimet për rrezik të lartë zjarri ishin në fuqi deri në orët e mbrëmjes për qarqet Los Angeles dhe Ventura, si dhe për shpatet e kanionit Antilopa.
Zjarri "Norte" po digjet rreth 32 kilometra në veri të zjarrit "Henderson", i cili shpërtheu në bazën ushtarake Camp Pendleton, në qarkun San Diego. Sipas informacioneve të publikuara, zjarri "Henderson" ka përfshirë rreth 8.000 hektarë.
Autoritetet lokale vazhdojnë të monitorojnë situatën dhe bëjnë apel tek banorët që të respektojnë urdhrat për evakuim dhe rekomandimet e sigurisë.
