Dmitrijev: Suspendimi i sanksioneve të reja kundër Rusisë është një moment historik
Vendimi i presidentit amerikan Donald Trump për të pezulluar zbatimin e sanksioneve të reja kundër Rusisë përbën një "moment të rëndësishëm dhe me të vërtetë historik", vlerësoi Kiril Dmitrijev, përfaqësues special i presidentit rus për investime dhe bashkëpunim ekonomik me jashtë.
Dmitrijev në Telegram theksoi se ligji i ashtuquajtur Graham, i emëruar sipas senatorit amerikan Lindsey Graham, mund të rrezikojë seriozisht bashkëpunimin ekonomik midis Rusisë dhe SHBA-së, me pasoja për ekonominë amerikane dhe tregjet globale.
Sipas tij, bashkëpunimi ekonomik midis dy vendeve mund të kontribuojë në stabilitetin global dhe të krijojë bazën për ndërtimin e besimit dhe arritjen e paqes së qëndrueshme.
"Në vend të sanksioneve dhe konfrontimit, na nevojitet dialog, bashkëpunim i dobishëm reciprokisht dhe përgjegjësi e përbashkët për stabilitetin global", u shpreh Dmitrijev.
Trump me urdhër ekzekutiv pezulloi zbatimin e masave të reja, të cilat duhej të hynin në fuqi më 18 tetor. Ligji parashikonte sanksione për subjektet ruse, kufizime për investimet e reja amerikane në Rusi dhe masa lidhur me importin e uraniumit rus.
Parashiheshin gjithashtu tarifa doganore prej 100 për qind për mallrat nga vendet që blejnë naftë ruse, si dhe masa shtesë ndëshkuese që mund të godisnin tregtinë ndërkombëtare me energjetikë ruse.
Trump arsyetoi vendimin duke vlerësuar se pezullimi i masave në këtë moment është në interes kombëtar të Shteteve të Bashkuara të Amerikës, por nuk shpjegoi publikisht arsyet e këtij veprimi. Megjithatë, më parë kishte folur për mundësinë e blerjes së naftës dizel ruse për të ulur çmimet globale të energjisë.
Pezullimi i përket masave të reja të parashikuara me ligjin dhe nuk nënkupton heqjen automatike të sanksioneve amerikane të mëparshme kundër Rusisë.
