Katër persona vdiqën, ndërsa tre janë të zhdukur në përmbytjet në Turqi

Katër persona vdiqën, ndërsa tre janë të zhdukur në përmbytjet që goditën Turqinë. Drejtoria e Përgjithshme e Meteorologjisë ka lëshuar paralajmërime të verdha dhe portokalli për 45 provinca për shkak të reshjeve të dendura dhe erës së fortë të parashikuar.

Paralajmërimi portokalli është lëshuar për Stambollin, Bursën, Kocaelin, Yalovën dhe Sakaryan, ndërsa paralajmërimi i verdhë vlen për 40 provinca të tjera, transmeton sot "Hurriyet".

Në Stamboll priten reshje shumë të dendura lokale, veçanërisht pas mesditës, dhe zonat më të rrezikuara mund të jenë pjesët veriore dhe ato anadollake të qytetit.

Reshje shumë të dendura, dhe në disa vende intensive, parashikohen edhe në Bursa, Bilecik, Kocaeli, Sakarya, Zonguldak, Bartin dhe zonat bregdetare të Düzce.

Reshje të forta me bubullima priten edhe në pjesë të rajoneve Egje, Mesdhe, Anadolli Qendror dhe Lindor, si dhe në pjesën perëndimore dhe qendrore të rajonit të Detit të Zi.

Meteorologët paralajmërojnë edhe erë të fortë dhe goditje të fuqishme me shpejtësi nga 50 deri në 70 kilometra në orë, që herë pas here mund të arrijnë deri në 80 kilometra në orë.

Në disa zona priten goditje të forta të erës nga perëndimi dhe veriperëndimi, ndërsa në rajonet e tjera era do të fryjë nga drejtimi jugor.

Për shkak të rrezikut nga përmbytjet e papritura, rrëshqitjet e dheut, goditjet e rrufeve, breshëri, dëmtimi i çative dhe ndërprerjet në trafikun rrugor, qytetarët janë thirrur të jenë të kujdesshëm dhe të respektojnë paralajmërimet e shërbimeve kompetente.

Në lartësitë më të mëdha në provincat Bursa dhe Kütahya gjatë natës dhe orëve të mëngjesit priten dëborë dhe dëborë të lagësht.