Inflacioni vjetor në Mal të Zi arriti në 5,2 përqind, niveli më i lartë që nga prilli 2024
Çmimet e karburanteve në Mal të Zi në shtator ishin 32,3 përqind më të larta krahasuar me të njëjtin muaj të vitit të kaluar. Transporti u shtrenjtuar për 18,5 përqind, ndërsa mirëmbajtja dhe riparimet e objekteve banesore për 12,9 përqind. Çmimet në restorante dhe kafene, nga ana tjetër, u rritën për 6,9 përqind.
Inflacioni vjetor arriti në 5,2 përqind, që është niveli më i lartë që nga prilli i vitit 2024, tregojnë të dhënat e Drejtorisë së Statistikave të Malit të Zi – Monstat.
Rritja e çmimeve të karburanteve dhe transportit kontribuoi me 2,17 pikë përqindjeje në inflacionin vjetor total, ose rreth 40 përqind të shkallës së përgjithshme.
Rritjen e çmimeve të karburanteve e kanë ndikuar lëvizjet në bursat ndërkombëtare, por edhe vendimi i qeverisë malazeze për të ulur vetëm pjesërisht akcizat mbi karburantet.
Çmimet e ushqimit u rritën për 2,6 përqind, por disa kategori regjistruan rritje më të madhe. Perimet u shtrenjtuan për 5,7 përqind, mishi dhe produktet e përpunuara të mishit për 4,7 përqind, ndërsa drithërat dhe produktet prej drithërave për 3,8 përqind.
Ushqimi përbën 33,5 përqind të shportës së konsumit që përdoret për llogaritjen e inflacionit. Rritja e çmimeve të tij kontribuoi me 0,85 pikë përqindjeje në inflacionin total.
Produktet e duhanit u shtrenjtuan për 15 përqind në nivel vjetor, pas dy rritjeve të akcizave nga qeveria – në janar dhe korrik. Çmimi i një pakete cigare u rrit gjithsej për 40 deri në 70 centë, dhe shtrenjtimi i duhanit kontribuoi me 0,43 pikë përqindjeje në inflacionin vjetor.
Shërbimet në restorante dhe kafene u shtrenjtuan për 6,9 përqind, ndërsa akomodimi në hotele dhe objekte private të regjistruara për 6,2 përqind.
Çmimet e shërbimeve telefonike, internetit dhe mediave u rritën për 5,7 përqind, veshjet dhe këpucët për 4,1 përqind, shërbimet e berberit dhe kozmetikës për 7,2 përqind, ndërsa shërbimet për riparim dhe mirëmbajtje të automjeteve për 8,8 përqind.
Ndër shtrenjtimet e tjera, çmimet e riparimeve më të mëdha dhe mirëmbajtjes së objekteve banesore u rritën për 12,9 përqind.
Ulje çmimesh u regjistrua në gjashtë grupe produktesh dhe shërbimesh. Shërbimet për largimin e ujërave të zeza u liruan për 13,1 përqind, furnizimi me ujë për 11,2 përqind, frutat për 6,5 përqind, ndërsa sheqeri, ëmbëlsirat dhe desertet për 3,7 përqind.
Çmimet e automjeteve u ulën për 0,5 përqind, ndërsa të pajisjeve të mëdha elektrike dhe të tjera të kuzhinës për 0,6 përqind.
