BE: Do të vazhdojmë t’i japim mbështetje Ukrainës dhe nuk do të heqim asnjë sanksion kundër Rusisë
Bashkimi Evropian do të vazhdojë t’i japë mbështetje Ukrainës dhe nuk do të heqë asnjë sanksion kundër Rusisë, thanë sot presidente e Komisionit Evropian, Ursula fon der Lajen, dhe presidenti i Këshillit Evropian, Antonio Costa.
"Një gjë është absolutisht e qartë: nuk do të heqim asnjë sanksion derisa Rusia të ndalojë këtë luftë", i tha Fon der Lajen gazetarëve para samitit të liderëve të BE-së, ku merr pjesë edhe presidenti ukrainas Volodymyr Zelenski.
"Mund të mbështeteni tek ne", premtoi presidenti i Këshillit Evropian, Antonio Costa, në një moment kur Zelenski përballet me kritika nga presidenti amerikan Donald Trump.
Trump në disa raste ka kërkuar ndryshimin e presidentit ukrainas dhe ka paralajmëruar plane për import të naftës dizel nga Rusia me qëllim uljen e çmimeve rekord të larta të karburanteve, si dhe plane për lehtësimin e sanksioneve ndaj Moskës.
"Kjo nuk është koha për lehtësim të sanksioneve ndaj Rusisë. Tani është koha të forcojmë mbështetjen tonë dhe të rrisim presionin ndaj Rusisë", tha Costa.
Para gjashtë ditësh, Trump njëanshmërisht shpalli "armëpushim energjetik" midis Rusisë dhe Ukrainës, duke akuzuar Zelenskin se me sulmet ndaj rafinerive ruse ka shkaktuar rritje të çmimeve botërore të naftës.
Presidenti ukrainas më parë deklaroi se Ukraina, edhe pse me rezerva, ka respektuar kërkesën e Trump për tre ditë, ndërsa Rusia njëkohësisht ka vazhduar sulmet ndaj infrastrukturës energjetike ukrainase.
"Sigurisht, ne mbështetëm armëpushimin energjetik të presidentit Trump, por pamë që Rusia nuk e respektoi – as për një minutë", tha Ursula fon der Lajen.
Në vend që ta respektojë armëpushimin, Rusia i ka intensifikuar sulmet, theksoi ajo, gjë që ka nxitur BE-në të fillojë përgatitjen e paketës së 22-të të masave ekonomike dhe financiare ndëshkuese kundër Moskës.
Zelenski, i cili ndodhet në Bruksel për samitin e BE-së, shprehu falënderim që mund të mbështetet tek liderët evropianë, të cilët janë në anën e Ukrainës që nga fillimi i luftës.
Sipas raporteve nga Kievi, SHBA-ja gjithashtu ka reduktuar sasinë e të dhënave të inteligjencës që ndan me Ukrainën dhe ka kufizuar aksesin në shërbimin satelitor të internetit "Starlink". Pritet që liderët e BE-së të fillojnë bisedime për mbështetje të mëtejshme për Ukrainën në vitet e ardhshme.
Vitën e kaluar, BE-ja krijoi një hua për mbështetje të Kievit në vlerë prej 90 miliardë eurosh, që i përket viteve 2026 dhe 2027. Edhe pse buxheti i Ukrainës për këtë vit është plotësisht i mbuluar, Kievi paralajmëroi për mungesë të konsiderueshme të fondeve financiare për vitin 2027.
Ministri ukrainas i financave, Serhij Marchenko, muajin e kaluar deklaroi se vendit i mungojnë 32.6 miliardë dollarë ndihmë ekonomike dhe 45 miliardë dollarë ndihmë për mbrojtje.
Kancelari gjerman, Friedrich Merz, dje, para bisedimeve me liderët e tjerë të BE-së, deklaroi se Europa do të duhet të rrisë mbështetjen financiare për Ukrainën.
