Milanoviq dënon lavdërimin e nazizmit në Split: Kjo është turpëruese dhe e papranueshme, duhen sanksione
Presidenti kroat Zoran Milanoviq dënoi sjelljen e një pjese të tifozëve të Torcida, të cilët dje në Split, para ndeshjes së futbollit mes Hajduk dhe Ajax në Ligën e Konferencës, brohorisnin slogane që lavdëronin regjimin nazist dhe ustash.
"E papranueshme, turpëruese dhe për çdo dënim është sjellja e një pjese të tifozëve të Torcida në Split. Brohoritjet dhe veprimet me të cilat hapur festohet regjimi nazist dhe ustash kërkojnë një reagim urgjent dhe sistematik nga policia kroate, prokuroria shtetërore dhe, në fund, gjykatat. I bëj thirrje të gjitha institucioneve kompetente që të marrin shumë seriozisht hetimin për këtë ngjarje turpëruese, që një gjë e tillë të mos përsëritet më", tha Milanoviq.
Ai theksoi se dënimet nga Qeveria nuk janë më të mjaftueshme dhe kërkoi masa konkrete dhe sanksione.
"Fjalët e dënimit që dëgjojmë nga Qeveria nuk janë më të mjaftueshme. Duhet të ketë masa dhe sanksione që do të tregojnë se në Kroaci nuk ka vend për lavdërimin e nazizmit dhe ustashizmit", theksoi presidenti kroat.
Milanoviq gjithashtu tha se tifozët që duan dhe respektojnë klubin e tyre të futbollit nuk duhet të jenë peng i një pakice që, sipas tij, nuk turpëron vetëm Torcida dhe Hajduk, por edhe tërë Kroacinë.
